AKÈY UEFA Champions League

Champions League

Yon premye Lig Dè Chanpyon pou Manchester City

sous: GolAyiti/imaj

10 Jen 2023 Jacky Chéry 4229

Manchester City enskri non l pami ekip ki ranpòte pi gwo konpetisyon klèb nan foutbòl ewopeyen an. Citizens yo genyen Inter Milan (1-0) nan final sa ki jwe jodi samdi 10 Jen 2023 a.

Nan yon match ki pa t gen twòp espektak pase sa, Sky Blues yo ranpòte premye Lig dè Chanpyon nan istwa yo avèk viktwa yo (1-0) nan estad olenmpik Atatürk la, Istanbul, peyi Latiki, sou yon gòl mitan tèren espanyòl la, Rodri, make nan 68èm minit.

Aprè plizyè echèk repete nan konpetisyon an sou 10 dènye ane yo, malgre gwo envestisman lajan katari yo, Manchester City rantre nan listwa jodi samdi an avèk viktwa li nan Lig Dè Chanpyon an pou sezon 2022-2023 a epi vini kòm dezyèm klèb anglè ki reyisi triple istorik la, aprè United nan lane 1990.

Citizens yo ki genyen FA Cup la ak Premier League la, fèmen sezon yo an ak twofe gwo zòrèy la ki vini aprè viktwa yo sou Nerazzurri yo ki te vle genyen yon katriyèm Lig Dè Chanpyon nan palmarès yo aprè 1964, 1965 epi 2010.

N ap mansyone, atakan ajanten an, Julian Alvarez ki pa jwe menm yon segond nan final sa rantre nan yon sèk trè fèmen ki genyen jwè ki ranpòte nan yon menm sezon Lig Dè Chanpyon an epi Koup Dimond. Ansyen jwè River Plate la te sakre chanpyon avèk Ajantin nan dènye mondyal la nan peyi Kata.