AKÈY UEFA Lòt Koze

Lòt Koze

Gwoup kalifikasyon mondyal pou zòn Ewopeyen an devwale: ki kote gwo ekip yo tonbe?

13 desanm 2024 Schmidt Jean 239

Malgre se zòn ewopeyen (UEFA) ki bay plis patisipan nan mondyal yo, se yo ki toujou kòmanse kanpay eliminatwa pou Mondyal pi ta nan dènye tan sa yo. Sitiyasyon sa pa chanje pou Mondyal 2026 la. Se maten an UEFA anonse repatisyon gwoup 54 peyi ki pral patisipe nan kanpay sa.

Pou kòmanse, UEFA pa mete Larisi pami ekip ki pral goumen pou 16 plas FIFA bay yo a. Gen 12 gwoup, 6 gwoup ak 5 ekip epi 6 gwoup ak 4 ekip. 12 premye nan gwoup respektif yo ap kalifye dirèk pou Mondyal la ki ap fèt nan peyi Kanada, Etazini ak Meksik. 12 dezyèm yo ak 4 pi bon twazyèm yo pral jwe pleyòf pou 4 dènye plas ki rete yo.

Pou kounya nou konnen nan ki gwoup pifò peyi tonbe. Men ekip ki toujou angaje nan Lig Nasyon UEFA yo (Espay, Frans, Peyiba, Dànmak, Pòtigal, Itali, Almay ak Kwowasi) poko konnen ki kote egzakteman yo ap tonbe. Match gwoup yo ap kòmanse nan jounen FIFA mwa mas 2025 epi y ap fini an nan jounen FIFA novanm 2025. Kanta pou pleyòf yo, se ap an mas 2026 (26 ak 31) kote ap gen kat wout disponib pou pran yon biyè sou 2 match, demi final epi final.

Men gwoup yo:

Gwoup A (4 ekip): Gayan Almay/Itali (LDN), Slovaki, Ilanndinò ak Liksanbou.

Gwoup B (4 ekip): Laswis, Lasyèd, Sloveni ak Kosovo.

Gwoup C ( 4ekip): Pèdan Pòtigal/Dànmak (LDN), Lagrès, Ekòs ak Belarisi.

Gwoup D (4 ekip): Gayan Frans/Kwowasi (LDN), Ikrèn, Islann ak Azèbaydjan.

Gwoup E (4 ekip): Gayan Espay/Peyiba (LDN), Tiki, Jòji ak Bilgari.

Gwoup F (4 ekip): Gayan Pòtigal/Dànmak (LDN), Ongri, Ilann ak Ameni.

Gwoup G (5 ekip): Pèdan Espay/Peyiba (LDN), Polòy, Finlann, Lityani ak Malt.

Gwoup H (5 ekip): Otrich, Woumani, Bosni, Chip ak Sen Maren.

Gwoup I (5 ekip): Pèdan Almay/Itali (LDN), Nòvèj, Izrayèl, Estoni ak Mòldavi.

Gwoup J (5 ekip): Bèljik, Peyidegal, Masedwàn, Kazakstan ak Lichtennstay.

Gwoup K (5 ekip): Angletè, Sèbi, Albani, Letoni ak Andò.