Premier League

Chak ane chanpyona premye divizyon nan peyi Angletè a toujou gen yon ekip ki ap kreye sansasyon.

Sezon 2022-2023 a se te Magpies Newcastle yo ki te kreye sansasyon e te menm rive jwenn biyè kalifikasyon yo pou edisyon Champions League 2023-2024 la. Sezon pase Magpies yo te fini 4èm ak 71 pwen devan Liverpool ki te fini 5èm ak 67 pwen.

Ane sa se tou pa Aston Villa ki vle kreye sansasyon depi nan kòmansman sezon an. Depi aprè direksyon klèb sila a chwazi Unai Emery nan tèt ekip la, Aston Villa ap mache an bon kanson fè nan Premier League la.

Nan 2 jounen youn kole ak lòt, The Lions yo bat Manchester City ( chanpyon dènye edisyon Premier League la), epi yo bat Arsenal ( ki te fini dezyèm nan dènye edisyon Premier League la).

Aprè 16 jounen nan Premier League la, The Villans yo fè 11 viktwa, 3 match nil epi yo pèdi 2 match. Pwoteje Unai Emery yo make 35 gòl yo pran 20 gòl. Yo twouve yo nan 3èm plas klasman Premier League la ak 35pwen nan do Arsenal ki gen 36 pwen epi Liverpool ki premye ak 37 pwen.

Youn nan gwo estatistik klèb Aston Villa ak Unai Emery yo rive fè 15 viktwa youn kole ak lòt lakay yo. Depi sou 15 match Aston Villa pa kite pèsòn moun fè derespektan lakay li.

KÒMANTÈ

Denye atik yo