Ekspatriye

Melchie Dumornay nou pi byen konnen sou non Corventina, ap enpresyone nou pou sezon sa nan Arkema Première Ligue la. Jodi a, nan yon viktwa klè 3-0 Olympique Lyonnais kont Stade de Reims, jèn atakan ayisyèn nan make 2 gòl. Estatistik li yo montre yon gwo pwogrè ak yon pèfòmans ki deja depase nivo li te montre sezon pase a.

Melchie Dumornay kontinye ap pwouve tèt li kòm youn nan jwè kle Olympique Lyonnais nan chanpyona fransèz la. Avèk 8 gòl epi 2 pas gòl nan sèlman 8 match, jèn ayisyèn nan mete non li sou lis pi gwo kontribitè nan ekip Lyonnais an pou sezon 2024-2025 lan. Nan 10èm jounen an, li te make 2 nan 3 gòl ekip li a kont Stade de Reims, yon lòt prèv kapasite li pou fè diferans nan gwo moman yo.

Lè nou analize pèfòmans li nan sezon sa, diferans yo klè konpare ak sezon pase a. Pou sezon 2023-2024 la, Dumornay te jwe 13 match kote li te reyalize 6 gòl ak 5 pas. Sa vle di, pandan tout yon sezon, li te patisipe dirèkteman nan 11 gòl ekip li a. Sepandan, nan mwatye kantite match yo pou sezon sa la, li deja gen 10 kontribisyon (8 gòl, 2 pas), sa ki pwouve yon ogmantasyon nan efikasite li ak enpak li sou tèren an.

Pandan sezon pase a, Dumornay te montre anpil potansyèl kòm yon jèn jwè k ap entegre yon gwo ekip tankou Olympique Lyonnais. Men, sezon sa a, li ap montre li vin pi konfòtab nan wòl li, ak yon kapasite pou fini aksyon yo ki fè li tounen yon atou enpòtan pou ekip la. Li te kontribye nan anpil viktwa ekip Lyonnais a, e chak kontribisyon montre devlopman teknik ak taktik li sou teren an.

Melchie Dumornay ap montre sezon aprè sezon li genyen tout kalite pou l reyalize gwo bagay nan foutbòl Ewopeyen an. Avèk 8 gòl ak 2 pas nan mwatye kantite match li te jwe sezon pase a, li klè Dumornay ap grandi kòm yon jwez. Sezon 24-25 lan kòmanse avèk anpil pwomès pou Corventina, e pèfòmans li jiska prezan pa sèlman depase estatistik li yo pou sezon pase a, men li etabli l kòm youn nan jwez ki pi pisan nan Arkema Première Ligue la.

KÒMANTÈ

Dènye atik yo