AKÈY AYITI Ekspatriye

Ekspatriye

OL fini premye faz chanpyona byen, Melchie Dumornay fè bri, Roseline Eloissaint koule

sous: GolAyiti/imaj

14 desanm 2024 Steve Pierre 204

Olympique Lyonnais (OL) fèmen premye faz Arkema Première Ligue 2024-2025 la ak yon lòt viktwa enpresyonan (5-1) sou Nantes nan yon match ki te make yon fas a fas ant de (2) Grenadye: Melchie Dumornay ak Roseline Eloissaint. OL demontre fòs li pandan tout premye faz la, pandan de reprezantan Ayiti yo te make prezans yo, nan fason pa yo.

Nan match sa ki te jwe pou 11èm jounen chanpyona a, Olympique Lyonnais, ki te jwe lakay li, pa pran tan pou enpoze dominasyon li. Nan 11èm minit, Melchie Dumornay te louvri eskò. Jèn Grenadye an te fè double nan 24èm minit, mete OL konplètman an konfyans. Lindsey Horan (22') ak Vanessa Gilles (31') te ajoute lòt gòl pou mete nòt la (4-0) nan premye mitan an.

Nantes te reponn ak yon gòl nan 67yèm minit gras ak Camille Robillard, men OL t ap toujou fèmen match la sou yon nòt fò. Amel Majri te make yon senkyèm gòl nan 87èm minit pou sele yon lòt viktwa pou Lyonèz yo (5-1).

Melchie Dumornay, ki te jwe yon gwo wòl nan premye mitan an, te kite teren an nan 70èm minit pou bay vedèt Ada Hegerberg plas la. Bò kote Nantes, Roseline Eloissaint te montre anpil detèminasyon pandan tout match la, malgre li te difisil pou ekip li an fè fas ak dominasyon Fenottes yo.

Avèk viktwa sa a, Olympique Lyonnais fini premye faz chanpyona a an premye pozisyon avèk yon dosye enpresyonan: 10 viktwa, 1 match nil, 50 gòl make kont sèlman 3 yo pran, epi pran 31 pwen sou 33 posib. Melchie Dumornay, yon pyon enpòtan nan sistèm Lyonèz yo, patisipe nan 12 nan 50 gòl sa yo ak 10 gòl epi 2 pas desizif.

Pou Roseline Eloissaint, menm si Nantes ap konbat nan dezyèm pati tablo a, Grenadye a rete yon eleman kle nan ekip li an, e li montre kapasite li nan tout match li jwe yo.

OL pral antre nan faz retou a ak konfyans, pandan yo rete favori pou ranpòte tit la. Pou Melchie Dumornay, sezon sa, yon lòt fwa ankò ak Lyon kontinye montre li se yon jwè kle nan ekip sa ki gen anpil prestij. Pou Roseline Eloissaint, faz retou a pral yon lòt opòtinite pou montre kouraj li epi ede Nantes chèche plis pwen nan klasman an.