Lòt Koze

Pale de Pelé se pale de yon referans, yon wa nan istwa foutbòl la. Edson Arantès do Nascimiento se non konplè li, li fèt le 23 Oktòb 1940 nan vil Très Corações ki twouve l nan Etat Mina Geiras nan peyi Brezil. Gras ak gran talan li, li ta pral rantre nan sant de fòmasyon AC Bauru-SP a, li te gen 16 lane.

Nan lane 1966, li te marye ak Rosemeri dos Reis Cholbi, yo genyen twa pitit : de fiy (Kelly Christina e Jennifer) ak yon gason (Edinho). Apre kèlke ane, swa an Avril 1994, li ta pral rankontre yon lòt fi (Assiria Lemos Seixas) avèk li, li gen yon pè jimo (Joshua e Céleste). Nan lane 2014, li te genyen 75 zan, li te marye yon lòt fwa ankò ak yon jèn fi ki se Marcia Cibele Aoki(25 lane).

Pakou Pelé ak Seleksyon Brezil la, FC Santos e Cosmos New York

Nan lane 1958, Pelé te jwe premye koup di mond li ki t ap òganize nan peyi Laswèd. 17tan sèlman, li ta pral antre nan istwa foutbòl la gras ak gwo pèfòmans li. Li te menm rive fè yon double nan final la fas ekip Laswèd la. Skò final 5 : 2 anfavè Brezil. Alepòk te chaje anpil bon jwè ki te akonpanye Pelé nan premye koup Brezil nan zafè koup di mond, tankou : Garrincha, Rivelino, Didi, Gilmar, Nilton, Djalma Santos elatriye...

4 lane pita, swa an 1962, Pelé ta pral jwe 2èm koup di mond li avèk Brezil nan peyi Chili. Malerezman pou li depi nan 2èm match li te choke pou tout rès konpetisyon an. Se te yon move kou pou tout fanatik Brezil . Erezman, Garrincha ta pral fè tout sa l konnen pou ede Brezil chanpyon sou Tchékoslovaki (3 : 1).

Lane 1970 pral rete nan memwa tout bon pasyone foutbòl kòm pi bèl koup di mond, yon koup di mond kote Pelé ta pral montre tout talan li. Se premye fwa yon koup di mond ta pral retransmèt nan televizyon an koulè. Meksik se te peyi òganizatè. Tout meksiken se te fanatik Brezil, fanatik Pelé. Ebyen, malgre tout kritik Pelé te konn resevwa sou move randman li te konn bay, li pat janm dekouraje sa ta pral menm yon fòs pou l te travay plis. Angajman l, detèminasyon l ak talan li ta pral ede Brezil chanpyon pou yon 3èm fwa nan istwa koup di mond fas ekip Itali a (4-1) ak yon bèl gòl de Pelé.

Avèk seleksyon Brezil la, li te pran twa koup di mond(1958, 1962, 1970).

Nan lane 1959, li te fini pi bon bitè Copa America a.

Li te fè premye seleksyon li a 16zan le 07 jiyè 1957 fas ekip Ajantin nan.

Li se meyè bitè seleksyon Brezil la avèk 77 gòl nan 92 rankont li jwe.

Avèk Santos, li te rive pran anpil koup tankou :

2 koup entèkontinantal(1962, 1963)

2 copa Libertadores(1962, 1963)

4 chanpyona de Rio-São Paulo(1959, 1963, 1964, 1966)

10 chanpyona de São Paulo(1958, 1960, 1961, 1962, 1964, 1965, 1966, 1967, 1968, 1969, 1973)

11 fwa meyè bitè chanpyona de São Paulo : 1957(17gòl), 1958(58gòl), 1959(45gòl), 1969(33gòl), 1961(47gòl), 1962(37gòl), 1963(22gòl), 1964(34gòl), 1965(49gòl), 1969(26gòl), 1973(11gòl).

5 koup de Brezil(1961, 1962, 1963, 1964, 1965)

Avèk Cosmos New York li te ranpòte chanpyona Nò Amerik la nan lane 1977. Se nan menm ane sa li ta pral mete fen nan karyè foutbòl li.

Poukisa Pelé pat jwe an Ewòp ?

Ebyen, nan epòk sa, chanpyona brezilyen an te fè pati pi gwo chanpyona nan mond lan. Tout gran jwè brezilyen yo t ap jwe nan chanpyona lakay yo. Malgre anpil gran klèb an Ewòp te fè foli pou li. Men gouvènman Brezilyen an ta pral deklare ke Pelé se yon trezò nasyonal, li pa pou vann. Se vre ke Pelé pa jwe an Ewòp men li jwe anpil match fas ekip an Ewòp yo. Li te make yon total de 205 gòl nan 196 match fas ekip Ewopeyen yo. Pou fini, Pelé te jwe 1384 match nan karyè li pou 1283 gòl. Selon FIFA, Pelé te fè 757 gòl ofisyèl nan karyè l.

KÒMANTÈ

Dènye atik yo