AKÈY FIFA Lòt koze

Lòt koze

Koup dimond fanm U20 : Lajantin bwè dlo bouch li devan Almay

12 septanm 2024 Steve Pierre 1191

Nan kad onzyèm edisyon Koup Dimond U20 bò kote medam yo k ap òganize nan peyi Kolonbi. Seleksyon Almay la pouse do Ajantin deyò nan konpetisyon an aprè li fin bat li nan 1/8definal yo.

Nan Estadio Metropolitano de Techo a, nan vil Bogotá, seleksyon Ajantin nan t ap jwe kont Almay, yon match ki te konte pou 1/8definal Koup Dimond U20 bò lakay medam yo k ap òganize nan peyi Kolonbi. National Mannchafts la fè yon sèl bouche ak sidamerikèn yo. Aprè sèlman 37 minit nan match la, ewopeyèn yo te gentan ap mennen (4-0) gras ak : Janzen (6'), Nachtigall (24' ak 37') epi Bender (26').

Anvan mitan an te fini, Lombardi Larrere ta pral redwi eskò a pou Lajantin. Yon mitan ki ta pral fini konsa. Nan dezyèm mitan an sitiyasyon an pa t chanje pou Lajantin, jèn medam yo te kontinye monte lesyèl pa do, lè Zicai nan 69e minit ta pral mete match foutbòl la ak (5-1) e ki ta pral fini konsa tou. San jwenn okenn solisyon, Kishi Núñez ak koyekipyè l rate posiblite pou te ka bay Albiceleste a premye twofe li nan kategori sa.

Pou kadefinal yo, Almay ap genyen pou jwe kont Etazini dimanch k ap vini la, sann pa bliye Brezil k ap jwe kont Koredinò, nan menm jou sa, aprè li te fin elimine ekip Kamewoun nan (3-1) nan 1/8definal yo.