AKÈY FIFA Lòt koze

Lòt koze

Yo vòlè yon bag Neymar pandan l ap salye kèk fanatik, kisa bagay la ye ?

11 novanm 2024 Steve Pierre 218

Semèn pase a, yon videyo ki t ap sikile sou rezo sosyal yo te mete Neymar nan yon sitiyasyon konfizyon. Pandan match Al-Hilal nan Lig chanpyon Azi an, nan moman jwè brezilyen an t ap salye fanatik li yo anvan li antre sou teren an, yon moun te vòlè yon bag lò nan men Neymar. Videyo a, ki te vin tounen anpil sou entènèt la, montre brezilyen an ap gade dwèt li, san sispèk anyen, pandan li kontinye pou l antre sou teren an.

Aprè sa ki te pase a, anpil moun te kòmanse pale sou valè bag Neymar a. Laprès te rapòte bag la te estime a yon valè ki ka depase 14 milyon euro, yon pri ki san dout te souke anpil moun. Yon lòt enfòmasyon ki te soti fè kwè vòlè a te pwofite moman sa pou li fè yon ti kòb rapid sou entènèt la. Yo te di li mete bag la sou yon sit e-commerce pou l vann li, yon aksyon ki te lakòz plis pale anpil nan mitan fanatik Neymar yo. Medya saoudyen yo rapòte idantite vòlè a yo toujou pa konnen l, sa te kreye plis enkyetid sou evènman an. Sa ki te plis frape a, se te videyo a ki te fèt pandan Neymar te ap gade dwèt li, kote li sanble li ta pèdi yon bagay. Malgre Neymar pa t fè okenn reyaksyon nan moman sa a, li te pral deklare pita li pa t viktim okenn vòl.

Apre nouvèl la te vin popilè sou rezo sosyal yo, Neymar pa t kite moun pale sou li san reponn. Nan yon kòmante li fè sou Instagram anba yon paj foutbòl, li te fè konnen sa a se yon fo nouvèl ki pa gen okenn baz. "Nou gentan fou. Semèn sa a sèlman, gen twa fo nouvèl ki sòti sou mwen. Yon paj konsa, ak anpil moun k ap swiv li, ap gaye manti. Sa konplike bagay yo... Li tris pou Brezil trete m konsa," se sa li te ekri. Etwal brezilyen an te fè konprann li pa t pèdi okenn bijou, ni nan moman salitasyon an ni nan okenn lòt okazyon. Li te ensiste pou di nouvèl la te san fondman. Neymar te fè wè fason fo nouvèl yo ap gaye rapid, espesyalman sou rezo sosyal yo, kote chak ti detay ka vin tounen yon gwo diskisyon. Nan yon lòt videyo ki te vinn parèt sou rezo yo, montre anvan ansyen jwè PSG a te salye fanatik yo li pa t gen okenn bag nan men li.

Apresa, Neymar te fè fas a yon lòt sitiyasyon difisil nan menm match la. Pandan dezyèm mitan an, li te sibi yon blesi nan kwis dwat li apre yon fot Zamani, yon jwè nan lòt ekip la te fè sou li. Pou moman sa, jwè a reblese pou 4 a 6 semènn avèk posiblite pou l rejwe nan fen ane 2024 la, sa ki pral depann de klèb la, Al-Hilal.