Depi kreyasyon nou sa gen anviwon katran edmi, GolAyiti ki se yon medya foutbòl ki pibliye sèlman an kreyòl, vin tounen tounen plis pase yon sous pou nouvèl sou foutbòl. Nou selebre kilti, idantite ak langaj Ayisyen. Lè nou konsidere travay nou te kòmanse a ak objektif nou, espesyalman nan yon jou tankou jodi a ki selebre lang Kreyòl la, li esansyèl pou nou bat lestomak nou pou wòl nou jwe nan fè pwomosyon pou Kreyòl kòm yon zouti ki makonnen kominote Ayisyen an ak kòm yon zouti pou enfòme tizè foutbòl yo.

Konviksyon fèm nou pou nou kontinye bay tout kalite nouvèl sou foutbòl an Kreyòl la se yon chwa san fòse e se yon estrateji. Malgre pifò medya nan domèn nan chwazi pwodui an fransè oswa jis pibliye an Kreyòl tou, noumenm nan GolAyiti nou chwazi pwodui epi kominike an Kreyòl pou onore epi bay kilti ak eritaj manman ak papa nou jarèt. Ak atik, brèv ak tout enfòmasyon bon kalite e ki kredib nou bay nan tan apwopriye yo, nou montre byen klè jan nou valorize lang Kreyòl la e nou montre tout moun kapab e ta dwe itilize l kòm mwayen pou pale sou tout koze sofistike nan mond foutbòl la ak espò an jeneral. Chak atik, chak analiz, chak brèv nou pibliye nou byen prepare yo pou yo rive sou odyans nou an sa ki fè Kreyòl se pilye oubyen mak fabrik GolAyiti.

Nan ane ki pase yo inovasyon nou pote yo jwe yon wòl kapital nan bati yon kominote ki kwè nan lang Kreyòl la a ki renmen itilize l. Gras ak teknoloji modèn yo nou rive kreye yon sit wèb 100% an Kreyòl. Nou se premye medya nan domèn espò a ki fè sa e nou toujou youn nan ra medya si gen lòt ki fè sa.

Mete sou sa, nou kreye aplikasyon mobil an Kreyòl toujou ki bay atik nou yo, enfòmasyon sou klèb Ayiti kou peyi etranje, jwè vedèt seleksyon nasyonal la. Kalite aplikasyon mobil sa yo se kalite moun konn jwenn nan gwo lang etranje yo men ak pasyon nou epi angouman nou pou mete lang Kreyòl la pi wo, nou fè inovasyon sa yo. Nan aplikasyon nou an gen yon jwèt kesyon/repons sou foutbòl an Kreyòl toujou sa ki pèmèt itilizatè yo pran plezi yo e kenbe antouzyas yo. Apwòch pèmèt nou depase limit bay enfòmasyon, se yon fason aktif nou divèti odyans nou an pou n toujou kenbe Kreyòl nan lespri yo e ede yo konprann jan li Kreyòl la bèl e li san parèy.

Fokis nou sou lang Kreyòl la bati yon kominote ki ap grandi chak jou pi plis kote nou envite tout moun alawonnbadè e sa yo vin kwè nan tèt yo pi plis paske yo ka konprann pi byen epi eksprime sa k nan panse yo. Nan yon mond kote globalizasyon ap vale tèren, tout moun vle itilize lang ki pi ekonomik pou yo, lè nou itilize Kreyòl kòm lang ofisyèl GolAyiti, nou envite tout moun nan konvèsasyon nou yo e nou ba yo valè. Sa fè tout nouvèl sou foutbòl vin pi aksesib e plis moun rive konprann kèlkeswa nivo edikasyon yo, estati sosyal yo oubyen kote yo ap viv. Sa fè ni noumenm ni lektè nou yo fyè paske yo wè idantite yo (se Kreyòl nou ye) reflete nan kontni nou pwodui yo.

Jodi a nou ap selebre jounen entènasyonal lang Kreyòl, GolAyiti se yon temwayaj sou kapasite Kreyòl nou an genyen kòm yon mwayen pou kominike epi pou inove. Gras ak dedikasyon nou, estrateji nou epi konviksyon nou pou nou toujou voye Kreyòl monte, nou pa sèlman bay enfòmasyon sou foutbòl, nou ap selebre lang nan chak jou, ankouraje fyète nan itilizasyon lang nan epi fè pwomosyon inite pami Ayisyen paske Kreyòl la se may ki pi solid nan chèn inyon Ayisyen an.

GolAyiti pran detèminasyon pou kontinye enfòme, kontinye fòme, kontinye enspire pou nou montre Kreyòl la vivan e se lang devlopman Ayiti, depi nan preparatwa jiskaske nou chanpyon.

GolAyiti se kredibilite ak inovasyon.

Foutbòl Pale Kreyòl Konprann