Lòt Koze

Nan kad premye edisyon "Coupe Nostalgie" oubyen "Coupe des Doyens" an, kat (4) ekip te mete fòs yo ansanm pou montre foutbòl toujou vivan an Ayiti, malgre difikilte yo. Violette AC, Racing Club Haïtien, Aigle Noir AC, ak Akademi Saint-Louis de Gonzague lan te angaje depi 11 desanm pou rive Dimanch 22 desanm sa nan yon tounwa ki chaje ak rivalite ak tradisyon.

Sitiyasyon difisil peyi a fè prèske enposib pou òganize tounwa ak chanpyona lokal. Sa te fòse ekip yo chache yon fason pou mete foutbòl la an valè. "Coupe Nostalgie" fèt pou raple tout moun foutbòl se yon pati enpòtan nan kilti nasyonal la, pandan y ap voye yon mesaj lespwa: foutbòl pa mouri an Ayiti.

Tounwa sa a te reyini kat (4) : Violette Athletic Club (VAC), Racing Club Haïtien (RCH), Aigle Noir AC ak Akademi Saint-Louis de Gonzague

Chak ekip te jwe 3 match pandan faz gwoup la. Men rezilta yo:

• Violette AC (6-1).Saint-Louis

•Aigle Noir (3-1) Racing CH

•RCH (2-0) Saint-Louis

•Aigle Noir (0-1) Saint-Louis

•Violette AC (3-2) Racing CH

•Violette AC (3-1) Aigle Noir

Violette AC te fè yon demonstrasyon pouvwa pandan tout faz gwoup la. Yo ranmase 9 pwen sou 9 posib, ak 12 gòl pandan yo sèlman pran 4. Jwè tankou Elyvens Dejean ak Molensky Cima te frape fò nan match yo.

Racing Club Haïtien, rival istorik yo, rive nan final la kòm dezyèm ekip gras ak yon viktwa kont Saint-Louis. Malgre kèk feblès nan defans yo a, ekip la montre li kapab bay nenpòt ekip pwoblèm nan faz eliminatwa a.

Final la, ki ap jwe jodi 22 desanm nan, ap mete Violette AC ak Racing Club Haïtien bab pou bab, de klèb ki gen yon istwa rich ak yon rivalite chaje ki emosyon. Match sa a pwomèt yon gwo batay foutbòl kote VAC ap eseye konfime dominasyon li pandan RCH ap chache pran revanch.

Klasman Faz Gwoup la:

1. Violette AC – 9 Pwen, 12 gòl make, 4 pran, diferans +8

2. Racing Club Haïtien – 3 Pwen, 5 gòl make, 6 pran, diferans -1

3. Aigle Noir AC – 3 Pwen, 4 gòl make, 5 pran, diferans -1

4. Saint-Louis de Gonzague – 3 Pwen, 2 gòl make, 8 pran, diferans -6

"Coupe Nostalgie" pa sèlman yon tounwa, men yon selebrasyon espò nasyonal la. N ap tann final la jodi a kote tout je ap sou VAC ak RCH, de ekip ki vle pote tit sa lakay yo, nan yon moman kote foutbòl ayisyen bezwen plis inisyativ pozitif.

KÒMANTÈ

Denye atik yo