Premier League

Malgre pri transfè rekò li nan istwa Premier League la, Jack Grealish ap viv yon peryòd difisil ak Manchester City. Depi yon lane, vedèt anglè a pa fè okenn gòl nan okenn konpetisyon ak klèb li.

Statistik yo pale klè : nan 45 match li jwe nan ane 2024, Jack Grealish poko rive mete yon boul nan filè pou klèb li. Dènye fwa li te fè yon gòl ak Manchester City, se te 16 desanm 2023, kont Crystal Palace. Depi lè sa a, li pa ka fè diferans ni nan Premier League, ni nan FA Cup, ni nan Carabao Cup, ni tou nan Champions League la.

Kèk obsèvatè panse Grealish gen difikilte pou konfime estati li kòm youn nan jwè ki pi chè nan istwa foutbòl anglè a. Antouka, se yon transfè 117 milyon ewo klèb la te mete sou li nan mwa dawout 2021, ki te fè l pase kòm pi chè nan Premier League la, jiska kèk ane pita lè Chelsea te achte Moisés Caicedo pou 133 milyon ewo.

Pou 2024 la, Manchester City gen sèlman de (2) match li rete : 26 desanm kont Everton epi 29 desanm kont Leicester. Kesyon an rete poze : èske Jack Grealish ap ka kraze sèk san gòl sa avan nouvo ane a kòmanse ?

Si Jack Grealish pa rive fè gòl nan de (2) dènye match yo, ane 2024 la ap pase nan istwa l kòm youn nan pi move ane atakan sa a avèk Manchester City. Rete pou wè si li ap ka reprann fòm li nan ane k ap vini an.

KÒMANTÈ

Denye atik yo