Ekspatriye

Atakan ayisyen an Carnejy Antoine disparèt nan lakou foutbòl la gran lajounen devan je tout ayisyen.

Jwè sila ki te youn nan jwè ki te konn fè pale de li, sitou pandan dènye pasaj li nan US Orleans, ki te fèl jwenn premye konvokasyon l ak seleksyon nasyonal la sou Jean Jacques Pierre.

Pou premye match li ak seleksyon an li te make 2 gòl nan viktwa Ayiti kont zile Tikennkaykòs nan dat 5 jen 2021 nan kad kalifikasyon mondyal 2022.

Apre premye match sa, Carnejy Antoine ta pral lage rara nan seleksyon an kote li te make 12 gòl nan 19 match li jwe ak seleksyon an.

Dènye fwa Carnejy konvoke ak seleksyon an se pou match Lig Nasyon Concacaf la kont Kiba ak Jamayik nan lane 2023.

Depi apre match sa yo, jwè a disparèt nan pano federasyon an ak nan memwa tout ayisyen.

Apre pasaj li nan plizyè klèb nan peyi Pòtigal kote l te jwe premye divizyon ak Casa Pia, men randman l pa t konvenkan. Yo te oblije prete l bay klèb dezyèm divizyon SCU Torreense, apre li pral ale nan yon klèb dezyèm divizyon ankò ki se Feirense, toujou nan peyi Pòtigal.

Pou kounya, jwè a gen 33 lane e li ap jwe kounya nan Valenciennes, yon klèb ki nan National 1 (3èm divizyon) nan peyi Lafrans. Avèk nouvo klèb li an, sezon sa, li jwe 12 match, li titilè nan 2, epi li make 3 gòl.

KÒMANTÈ

Dènye atik yo