Seleksyon Nasyonal

Seleksyon nasyonal gason U17 lan kòmanse yon etap preparasyon pou eliminatwa Mondyal U17 FIFA a ki ap fèt nan peyi Kata an novanm 2025. Avèk Eddy César kòm tèt estaf teknik lan, objektif la klè : pran premye plas nan gwoup E a pou rive nan gwo randevou sa a.

Federasyon Foutbòl Ayisyen an (FHF) lanse ofisyèlman preparasyon pou seleksyon nasyonal U17 lan. Premye estaj antrènman an te kòmanse depi vandredi 20 desanm 2024 nan Pòtoprens, yon etap esansyèl anvan ekip la antre nan konpetisyon an nan mwa fevriye 2025 k ap vini la.

Nan gwoup E a, Ayiti pral fè fas ak peyi Gwatemala, ki se òganizatè faz sa a, ansanm ak Antigwa epi Sen Vensan. Objektif ekip la se fini an tèt gwoup la, yon pozisyon ki bay tikè dirèk pou Mondyal la, kote Concacaf pral voye 8 peyi.

Ekip U17 lan, ki sou sipèvizyon Eddy César, gen avantaj ajoute kèk jwè ki te fè bèl pèfòmans nan chanpyona U15 Concacaf an 2023, kote yo te fini an 3e pozisyon. Sa bay plis espwa pou jèn Grenadye yo.

Eliminatwa yo ap fèt nan plizyè peyi nan zòn Concacaf, tankou Bèmid, Kosta Rika, Gwatemala, Ondiras, Meksik, ak Panama. Pou Ayiti, premye batay la ap dewoule nan lakou Gwatemala sòti 7 pou rive 16 fevriye 2025.

Seleksyon U17 gason an antre nan yon peryòd detèminasyon ak travay di. Avèk yon staf ki angaje ak talan jèn jwè yo, tout je fikse sou premye plas nan gwoup E a, ki se sèl chemen pou Ayiti rive kalifye nan Mondyal la.

KÒMANTÈ

Denye atik yo