AKÈY FIFA Lòt koze

Lòt koze

Hakim Ziyech : « M poko janm wè yon antrenè sòt konsa »

24 desanm 2024 Steve Pierre 155

Relasyon ant Hakim Ziyech ak klèb Galatasaray la ap fini mal. Entènasyonal mawoken an, ki te rive nan klèb Tik la an 2023, eksprime fristrasyon l nan yon entèvyou kote li takle antrenè a, Okan Buruk, epi anonse li pral kite klèb la pandan mache transfè ivè a. Sitiyasyon an vin pi konplike ak salè li yo pa ba li epi presyon dirèk klèb la.

Entèvansyon Hakim Ziyech devan medya Tik yo fè anpil bri. Moun k ap swiv foutbòl tande pawòl difisil Ziyech di sou antrenè Galatasaray la, Okan Buruk : "Mwen poko janm wè yon antrenè sòt konsa, li gen yon nivo tèlman ba. Mwen regrèt anpil desizyon mwen te pran pou vini isit. Pou mwen, Galatasaray fini.

Ziyech te kontinye kritike klèb la pandan li di li pa gen okenn enterè nan objektif ekip la. "Si Galatasaray ka pran chanpyona? Mwen pa entèrese... Mwen vle sèlman yo kite m trankil," se sa li te deklare. Sitiyasyon an vin pi grav apre yon sous te konfime sou sit Madar21 Galatasaray pa peye Ziyech salè l depi plis pase kat (4) mwa. Salè jwè mawoken an monte jiska 250 000 ewo pa mwa. Sous la te ajoute klèb la pa menm te peye tout pati nan prim lè li t ap siyen an.

Nan yon sezon kote li te sèlman jwe 320 minit nan 11 match, ak yon sèl pas gòl. Ziyech montre li pa santi l alèz nan klèb Tik la. Selon enfòmasyon ki soti bò kote jounalis Rudy Galetti, plizyè klèb nan Arabi Sawoudit gen enterè pou rekrite jwè a pandan mache transfè k ap vini an.

Sitiyasyon ekonomik difisil sa ajoute plis tansyon nan relasyon jwè a ak klèb la. Sous la te kontinye fè konnen : "Galatasaray ap fè presyon malonèt sou Ziyech epi yo itilize tout mwayen posib pou fòse l kite klèb la nan pwochen mache transfè ivè a."

Galatasaray, ki te wè Ziyech kòm yon gwo ranfòsman lè yo te achte l nan mwa dawout 2023 apre yo te prete l nan Chelsea, pa t janm ka jwenn pi bon nivo jwè a. Avèk yon salè ki pa peye, konfli ak antrenè a, ak presyon dirèk, Ziyech deside li pa ka kontinye nan kondisyon sa yo. Yon sèl bagay li bezwen se retire kòd ki nan kou l la pou l ale.