Premier League

Nan yon match ki te jwe nan Anfield la jodi a, pou 20èm jounen Premier League la, Liverpool ak Manchester United fè match nil (2-2). Mohamed Salah te ajoute yon lòt gòl nan palmarès li kont "Red Devils" yo. Depi lè li rive nan Liverpool an 2017, Manchester United rete pi gwo viktim li nan tout konpetisyon.

Nan yon match ki te chaje ak emosyon, Liverpool ak Manchester United te fè yon gwo espektak sou teren an. Mohamed Salah, ki se youn nan pi gwo bitè Premier League la, te make youn nan de (2) gòl Liverpool yo jodi a, ki fè li kontinye ap fè listwa kont gwo rival li nan chanpyona anglè a.

Depi lè li te siyen nan Liverpool 22 jen 2017, Salah fè tout estatistik sa yo kont Manchester United : 17 match, 16 gòl, ak 6 pas gòl. Nan Premier League sèlman, li genyen 13 gòl ak 6 pas nan 15 match. Nan FA Cup, li ajoute 3 lòt gòl nan 2 match. Manchester United se klèb ki resevwa plis pèn anba pye li nan tout konpetisyon yo.

Men sa ki pi enpresyonan toujou, Salah genyen lòt viktim ki toujou ap soufri anba kapasite atakan l yo : Tottenham pran 14 gòl, West Ham 13 gòl, Manchester City pran 12 gòl ak Arsenal ki pran 11 gòl. Ejipsyen an montre li se yon bèt nwa depi lè l ap mete mayo Liverpool la sou li, estatistik sa yo montre yo pa epanye ni piti ni gwo.

Depi lè li rive nan Liverpool, Mohamed Salah pa sispann enpoze dominasyon li sou gwo ekip yo an Angletè. Manchester United rete pi gwo viktim li. Avèk pèfòmans sa yo, atakan ejipsyen an kontinye fè pale de li, sitou sezon sa, kote yo menm ap site non li pou Balondò.

KÒMANTÈ

Denye atik yo