Copa Del Rey

Klèb madrilèn nan te genyen randevou nan 16èmdefinal Koup Espay anfas Deportiva Minera kote yo bat san twòp difikilte (5-0).

Carlo Ancelotti te deside fè woulman nan efektif la kote li pa t deplase ansanm avèk Courtois ak Antonio Rüdiger, men te genyen prezans Jude Bellingham, Kylian Mbappé, Rodrygo Goes ak Vinicius Jr, men antrenè a te mete yo demare sou ban an pou te kòmanse avèk Arda Güler, Brahim Diaz, Endrick, Fran García e de jèn nan defans lan ki se Diego Aguado ak Lorenzo Aguado.

Depi nan 45 premye minit yo, ekip Real Madrid la te gentan bay Deportiva Minera twa (3) gòl gras avèk Fede Valverde, Edouardo Camavinga ak Arda Güler ki te rann yo rantre byen nan vestyè a.

Lè yo retounen sou tèren pou al dispite dezyèm mitan an, Real Madrid te jwenn de (2) gòl ankò avèk Luka Modrić ak Arda Güler pou te klotire eskò match la (5-0) e kalifye fasilman pou 8èmdefinal konpetisyon an.

Vinicius Junior ki apenn sot pran katon wouj nan match kont Valence lan te rantre nan 63èm minit match la nan plas Luka Modrić e entènasyonal Fransè a, Kylian Mbappé te rantre nan plas Edouardo Camavinga menm moman an.

Pwochen match Real Madrid se pral pou jedi nan Sipèkoup Espay la kont Mallorca a (2è aprèmidi nan lè Pòtoprens).

KÒMANTÈ

Dènye atik yo