Ekspatriye

Jèn atakan ayisyen an, Frantz Pierrot, ap kontinye karyè li nan yon lòt peyi Ewopeyen. Aprè 2 lane kote li briye nan chanpyona Ilandè a, li siyen avèk FK Velež Mostar nan peyi Bosni jiska 2026.

Frantz Pierrot, ki se frè Frantzdy Pierrot, te fè yon gwo enpak nan peyi Iland pandan dezyèm etap karyè li. Aprè li te pase nan Athlone Town (D2) epi Drogheda United (D1), li kite Ilann ak yon bèl estatistik: 36 gòl ak 10 pas gòl nan 77 match ofisyèl.

Kounye a, li pral defann koulè FK Velež Mostar, yon klèb istorik nan peyi Bosni ki ap evolye nan Premye Divizyon an.

FK Velež Mostar se yon klèb ki genyen yon gwo repitasyon nan rejyon an. Li te fonde an 1922 e li pote non yon mòn ki tou pre vil Mostar. Klèb la te domine koze foutbòl la nan ansyen Yougoslavi, avèk 2 Koup Yougoslavi yo ranpòte an 1981 ak 1986. Aprè lagè Bosni a, klèb la te rankontre anpil difikilte, men li rete yon senbòl fyète pou fanatik li yo. Yo rele li "Rođeni".

Pou Frantz Pierrot, sa se yon gwo etap nan karyè li pandan l ap eseye mache sou tras frè li, Frantzdy Pierrot, ki deja etabli kòm yon vedèt sou kontinan ewopeyen. Frantz genyen chans pou li fè yon bèl eksperyans nan yon chanpyona ki byen konpetitif epi kontinye devlope talan li nan kontinan an.

Kounye a, Frantz Pierrot ap pare pou yon nouvo defi nan peyi Edin Dzeko a. Fanatik yo ap swiv avèk atansyon pou wè ki jan li pral enpoze tèt li nan Premye Divizyon an.

KÒMANTÈ

Dènye atik yo