Lòt Koze

Dezyèm vandredi mwa janvye a ap make yon rankont espesyal ant de (2) meyè ekip foutbòl ayisyen pou fanatik yo ki genyen nan moman an, Violette AC ak Real Hope FA. Match amikal sa a ap fèt nan Parc Sainte-Thérèse, kominn Petyonvil, ak 4è nan aprèmidi, epi li pwomèt yon bèl espektak foutbòl.

Violette AC, ki sot ranpòte Coup des Doyens nan mwa desanm pase a, ap chèche kontinye pwouve fòs yo kòm youn nan pi gwo ekip peyi a. Sou bò pa l, Real Hope FA, chanpyon nasyonal nan lane 2024, ap vini ak tout detèminasyon pou konfime tit yo kòm meyè klèb peyi a. Fòk nou pa bliye, ekip kapwa a te fini twazyèm nan Concacaf Caribbean Cup la epi li pral reprezante Ayiti nan Ligue des champions Concacaf la.

Match sa a pral sèvi kòm yon preparasyon estratejik pou tou de (2) ekip yo, espesyalman Real Hope FA, k ap chèche afinite teknik yo pou konpetisyon entènasyonal yo. Pandan se tan, Violette AC ap itilize moman sa a pou montre yo toujou nan bon fòm yo e yo pare pou batay kont nenpòt advèsè.

Tout fanatik foutbòl ayisyen yo ap tann ak enpasyans rankont sa a, ki ka deja bay yon ti lide sou ki ekip k ap domine sezon 2025 la.

Randevou a kase Vandredi 10 janvye 2025, 4è nan apremidi, Parc Sainte-Thérèse.

KÒMANTÈ

Denye atik yo