Lòt Koze

Youn nan pi bon jwè seleksyon nasyonal la te genyen nan Gold Cup 2019 la. Gold Cup ki te mete ayisyen deyò nan lè 10è nan aswè pou selebre remonntada Ayiti sou peyi Kanada (3-2) nan kadefinal. Jwè ki te make 2èm gòl nan match sa, Hervé Bazile, Ki kote li ye pou kounya a?

Hervé Bazile genyen 34 lane sou kòlòs bwa tèt li. Yon laj anpil jwè ap kontinye bay boul toujou nan mond foutbòl la. Men kanta pou atakan ayisyen sa, li pa di klè li mete fen nan karyè l, men pou kounya li san klèb depi jiyè 2024 aprè yon pasaj nan Ilvamaddalena yon klèb 4èm divizyon nan peyi Itali.

Hervé Bazil fè premye parèt li nan foutbòl pwofesyonèl nan lane 2009 ak ekip EA Guingamp yon klèb nan peyi Lafrans. Aprè li pral pase plizyè lòt klèb tankou Amiens SC, Poiré-sur-vie, SM Caen, Le Havre AC, Hérouville, Ilvamaddalena pou kounya Tempio.

Nan elit foutbòl la, Hervé Bazile te jwe nan yon klèb ki te nan Ligue 1 an ki se SM CAEN.

Match ki ta pral make lespri, se rankont 14 fevriye 2015 kont Paris Saint Germain ki te genyen ladann Zlatan Ibarahimović, Lucas Mura, Tiago Silva ak plizyè lòt gwo non. Aprè Paris Saint Germain te fin mennen 2-0 nan match sa, ekip SM CAEN an ta pral egalize nan fen match la gras ak yon gòl Hervé Bazile nan 90+2 minit malgre li te kòmanse match la sou ban.

Pandan pasaj li nan Ligue1, Grenadye a te make kont PSG, Reims, Bordeaux ak Monaco pou site sa yo sèlman.

Pandan bon moman l nan Ligue 1 an, federasyon ayisyèn lan te fè plizyè kout pye dèyè l men se te toujou san repons.

Premye fwa li pral aksepte vin jwe pou Ayiti se nan dat 2 jen 2019. Premye match li pral jwe pou Ayiti se fas Kostarika nan Gold Cup la. Li te sòti nan 75èm minit. Li pral titilè kont Kanada, li pral make gòl sou penal ki te pèmèt Ayiti egalize anvan Donald Guerier ta pral fè gòl 3-2 a.

Pou kounye a jwè a san klèb. Men selon Transfermarkt.fr ta sanble jwè gen akò ak yon klèb italyen ki rele ''Tempo''. Yon klèb selon rechèch nou ki san idantite.

KÒMANTÈ

Denye atik yo