Seleksyon Nasyonal

Pink Ladies Cup pa sèlman yon tounwa foutbòl fanm, men se yon gwo evènman ki melanje espò, sansibilizasyon ak solidarite. Ane sa a, li ap fèt nan peyi Latiki, kote objektif prensipal la se ankouraje batay kont kansè nan tete pandan y ap mete an valè talan ak detèminasyon atlèt fanm yo.

Pink Ladies Cup fèt nan mwa oktòb sa, ki se mwa mondyal pou sansibilizasyon kont kansè nan tete. Tounwa sa a genyen kòm misyon enpòtan pou enfòme piblik la sou enpòtans deteksyon bonè ak prevansyon. Kansè nan tete se youn nan kansè ki pi komen lakay fanm yo atravè lemond.

Tounwa sa a reyini ekip foutbòl fanm ki soti nan plizyè peyi diferan, pami yo : Jòdani, Larisi, Filipin, Kenya, Taypey Chinwa, ak Ayiti. Kote yo ka jwe ansanm nan yon lespri fratènite ak konpetisyon. Divèsite ekip yo montre jan batay kont kansè se yon bagay ki konsène tout moun, epi li montre fanm tout koulè po, tout longè cheve, yo ini pou yon menm objektif.

Pink Ladies Cup la pa sèlman limite nan jwèt foutbòl. Gen plizyè lòt aktivite ki òganize tankou atelye, konferans, ak bay enfòmasyon pou edike patisipan yo ak moun ki vin gade tounwa a. Aktivite sa yo ede enfòme piblik la sou risk kansè nan tete, metòd deteksyon yo, ak opsyon tretman ki egziste.

Tout lajan ki sòti nan Pink Ladies Cup la souvan ale nan òganizasyon ki travay kont kansè yo. Sa ede nan finansman rechèch medikal yo tou, bay sipò pou moun ki malad yo, epi ede fè sansibilizasyon sou sante fanm. Lè atlèt yo patisipe nan tounwa sa a, yo kontribye pa sèlman nan pasyon yo pou foutbòl, men tou nan yon kòz ki enpòtan pou milyon moun nan mond lan.

Pink Ladies Cup la tou se yon platfòm enpòtan pou devlopman foutbòl fanm. Li bay atlèt yo opòtinite pou yo montre talan yo sou sèn entènasyonal, pou yo enspire jèn tifi yo rantre nan espò, epi pou ankouraje egalite ant sèks nan domèn espòtif la. Lè tounwa a atire atansyon sou talan atlèt fanm yo, li ede chanje fason moun wè espò fanm nan epi ankouraje plis fanm pou yo patisipe nan foutbòl.

Jan nou sot di w la, Pink Ladies Cup la se pi plis pase yon senp tounwa foutbòl. Se yon evènman ki rasanble atlèt, fanatik, ak tout yon kominote nan yon batay kont kansè nan tete. Lè ekip yo patisipe nan konpetisyon sa a, yo pa sèlman jwe pou viktwa sou teren an, men yo tou ap goumen pou yon lavni san kansè. Lè nou soutni Pink Ladies Cup la, nou tout ap patisipe nan yon mouvman sansibilizasyon ak solidarite ki gen kapasite pou sove lavi plizyè milyon jèn tifi ak granmoun fanm.

KÒMANTÈ

Denye atik yo