Serie A

Chanpyona premye divizyon nan peyi Itali a, ki pote non Serie A tou, ap kòmanse wikenn sa pou sezon 2023-2024 li a. Serie A a se sèl chanpyona majè an Ewòp ki bay 4 chanpyon diferan pou 4 dènye sezon yo. Dayè nan yo gen 2 nan twa meyè antrenè sezon pase a (Inzaghi, Inter, ak Spalletti, Napoli).

Sezon sa pare kò l pou l pi bèl toujou pase sezon pase yo. Tout gwo ekip yo ranfòse yo, menmsi chanpyon an tit la, Napoli, pèdi antrenè yo a ak yon jwè enpòtan nan defans lan (Kim Min-Jae). Yo rive kenbe rès efektif yo a jiskaprezan e yo pral defann tit yo a ak tout sa yo genyen.

Inter ki te tou prè ranpòte Ligue des Champions an, te pran de (2) tit an Itali sou sezon an pral mete presyon pou pran Scudetto a. Kouzen yo, Milan bò kote pa yo fè yon revolisyon nan ete sa lè yo pran plis pase 9 nouvo jwè , yo pral chèche repran tit la nan men Napoli.

Juventus ki p ap jwe an Ewòp ditou sezon sa ranfòse ekip yo a tou e sa ba yo yon avantaj kont fatig nan kous pou tit la paske yo p ap gen pou jwe twòp nan mitan semèn yo. Kanta pou AS Roma, se 3èm sezon José Mourinho nan tèt ekip la. Ekip sa te pèdi final Europa League la, yon bagay Mourinho pa t dijere byen. Èske se sezon revanj yo sa pral ye?

Antouka men match k ap demare bagay yo:

Chanpyon an, Napoli ap deplase al kay yon nouvo figi, Frosinone, a 12:30 PM demen samdi a pou premye match sezon an. Nan menm lè sa tou Empoli ap resevwa Hellas Verona. Inter ap resevwa Monza a 2:45 PM. Menm lè a tou pou Genoa, ki fèk monte, kont Fiorentina.

Chanpyona a ap rapousuiv nan dimanch kote a 12:30 PM AS Roma ap resevwa Salernitana, Atalanta ap kay Sassuolo. Juventus bò kote pa l pral kay Udinese a 2:45 PM, nan menm lè sa gen yon Lecce kont Lazio.

Premye jounen an ap fini nan lendi kote a 12:30 PM Torino ap resevwa Cagliari, ki fèk monte. Epi pou dènye match la Milan ap an deplasman kay Bologna a 2:45 PM.

KÒMANTÈ

Dènye atik yo