Serie A

Inter Milan te afwonte ekip Lazio a nan estad Olimpico lendi 16 desanm nan pou fèmen 16èm jounen chanpyona Itali a. Inter Milan demantibile ekip Lazio a 6-0. Malgre kanaval gòl ekip la fè a, Lautaro Martinez pa make li menm.

Twoup Simone Inzaghi ap dirije a pa t manje anyen frèt jodia. Yo maspinen, mitonnen, pilonnnen ekip Lazio a kòmkwa yo te gen yon pwoblèm ak ekip la. Çalhanoglu te ouvè eskò a nan 41èm minit sou penal, 45èm minit Dimarco te jwenn gòl 2-0 .

Premye gòl, dezyèm gòl fèt, atakan ajanten an Lautaro Martinez te kòmanse match la. Non l pa site nan youn nan gòl ki te fèt nan premye peryòd la. Espwa a te toujou kenbe, ajanten an te ka make nan dezyèm peryòd la. 51èm minit, Nicolo Barella jwenn 3èm gòl la, 53è minit Dumfries pou 4èm lan, Carlos Augusto te tranble filè pou 5èm gòl la, Marcus Thuram te fè 6èm gòl la nan 90èm minit. Atakan ajanten an pa rive fè gòl pou ekip Inter a malgre ekip la fè 6.

Dènye fwa ajanten an te jwenn chimen filè pou Inter se te nan dat 3 novanm pou te pèmèt Inter Milan bat Venezia 1-0. Depi lè sa, li pa danse kole ak filè pou ekip inter a .

Viktwa sa pèmèt Inter Milan pran 3èm plas klasman an am 34 pwen, Lazio nan 5è plas la a 31 pwen.

KÒMANTÈ

Dènye atik yo