Serie B

Youn pami pi gwo gadyen nan istwa foutbòl la, Gianluigi Buffon, pwolonje kontra l pou yon lane anplis avèk klèb fòmatè li, Parme Calcio 1913, k ap jwe pou kounya nan dezyèm divizyon peyi Itali. Nan yon anons sou rezo sosyo yo, klèb pamezan an fè konnen anblematik gadyen italyen an pwolonje kontra l avèk klèb la jiska 2024.

Apre yon long karyè nan foutbòl entènasyonal la, Buffon sanble pa deside bay vag. Retounen nan klèb fòmatè li nan mwa jiyè 2021, chanpyon dimond 2006 lan reyisi enpoze l kòm titilè anba kan ekip Parme lan, kote l te kòmanse jwe foutbòl pwofesyonèl nan lane 1995. Pou sezon sa, sou 26 match konpetisyon, Gianluigi Buffon jwe 23 nan yo, sa ki ba l yon total 953 match sou tout karyè l.

Fòme epi kòmanse jwe kòm pwofesyonèl nan Parme, Gianluigi Buffon pami sila yo ki rive make istwa foutbòl la. Nan dat 8 fevriye 2022, fas Bevenento, pi gwo gadyen iswta seleksyon Itali a reyalize 500èm match nan karyè li san pran gòl. Yon rekò entèresan pou gadyen italyen an ki gen 44 lane aktyèlman.

Buffon se tou yon long karyè foutbòl. Kòmanse nan Parme an 1995, Gianluigi Buffon sou 27èm ane li depi l ap jwe kòm pwofesyonèl. Yon karyè ki make ak pasaj li nan Juventus nan lane 2001 pou rive 2018 nan yon premye tan, avèk yon pasaj tou kout nan Paris Saint-Germain pou sezon 2018-2019 la, avan pou l te retounen nan Juventus pou yon dezyèm fwa.

Aktyèlman 13èm nan chanpyona dezyèm divizyon Calcio a, Parme, nan moman anons pwolongasyon kontra sa pa t manke fè elòj gadyen yo an, «lejand lan ap kontinye. Li poko fini», sa nou rive li sou kont ofisyèl klèb la.

Nan moman kontra sa ap gen pou l bout, an 2024, Gianluigi Buffon ap gen 46 lane, kidonk avèk 953 match li deja jwe jounen jodia, li gen posiblite pou rive atenn yon sèk tou piti ki gen jwè ki jwe 1000 match pou pi piti sou tout karyè yo kòm jwè foutbòl.

KÒMANTÈ

Dènye atik yo