Bundesliga

Ayè dimanch lan, nan 5èm jounen Bundesliga a, Bayer Leverkusen fè yon gwo viktwa kont ekip Heidenheim nan. Depi kòmansman sezon an, Xabi Alonso ak jwè li yo poko pèdi yon match, pwosesis transfòmasyon an sanble ap kontinye sezon sa.

Nan BayArena a, ayè, Bayer Leverkusen kraze ekip Heidenheim nan (4-1). Boniface 2 gòl, Hofmann ak Adli se prensipal bitè Leverkusen yo. Pou kounya, Xabi Alonso ak jwè l yo chita nan 2èm plas klasman chanpyona Almay la ak 13 pwen. Yo gen menm kantite pwen ak Bayern Munich, ki premye nan klasman an. Bavawa yo pran devan pou yon pi bon diferans, +14 pou yo ak +11 pou Leverkusen.

Si nan ane pase nan lè konsa Bayer Leverkusen te 17èm nan Bundesliga a, li t ap batay pou pa desann nan 2èm divizyon. Yon lane aprè, Leverkusen ap goumen pou ranpòte chanpyona a. Transfòmasyon sa vini se gras ak yon nonm ki rele 《 Xabi Alonso 》. Ansyen mitan teren ekip Real Madrid la, nan yon lane, li transfòme Leverkusen, li fè ekip la pase de yon ekip òdinè a yon ekip redoutab an Ewòp.

Avan Alonso te vini, kijan ekip la te ye?

SV 07 Elversberg ta pral elimine Leverkusen nan premye tou Koup Almay la. Aprè 9 jounen nan chanpyona a pou sezon 2022/23 a, Bayer te fè yon sèl viktwa e li te chita kò l nan anvan dènye plas la. Nan sa ki gen pou wè ak Lig Dè Chanpyon, ekip la te gentan jwe 2 match, yo te fè 2 defèt tou, kont Club Bruges ak Porto.

Aprè defèt (2-0) kont FC Porto an, dirijan alman yo revoke Gerado Seoane kòm antrenè prensipal. Swis la fini avèk yon bilan : 26 viktwa, 10 match nil epi 20 defèt pou 56 match.

Kijan sa ye ak Xabi Alonso ?

Rapid vit, yo pran espanyòl la ki t ap antrene ekip B Real Sociedad la, pou antrenè prensipal klèb la. Pou premye match li, li kòmanse ak yon viktwa (4-0) kont Shalke 04. Bayer Leverkusen pral pwogrese sou tout pwen ak nouvo kotch la ki siyen pou jen 2024. Malgre yon 3èm plas nan LDC an, ki ta pral fè yo desann nan C3 a. Leverkusen ta pral elimine nan demifinal Ewopa Lig la. Nan chanpyona a, yo pase de 17èm a 6èm, sa ki ba yo yon kalifikasyon pou yon lòt sezon nan Ewopa Lig la.

Dirijan yo ki satisfè de travay Alonso a, 4 dawout ki sot pase la yo pwolonje kontra l jiska jen 2026, malgre anpil medya te voye l kòm ranplasan Carlo Ancelotti anndan ekip Real Madrid la. Bilan ansyen jwè Liverpool la ale konsa : Pou 44 match li fè : 23 viktwa, 11 match nil ak 10 defèt.

Pou sezon sa, Xabi Alonso ak Bayer Leverkusen kòmanse byen, pou 7 match jwe, ekip la make 29 gòl, yo pran 6 gòl, 0 defèt, 6 viktwa ak yon match nil kont Bayern Munich (2-2) nan Bundesliga a.

KÒMANTÈ

Dènye atik yo