Bundesliga

Harry Kane ap viv yon sezon ekstraòdinè avèk Bayern Munich. Depi li te rive nan klèb Alman an pandan ane 2023 a, atakan anglè a montre yon kapasite san parèy pou adapte li ak yon nouvo lig pandan li kontinye make gòl seryezman. Kane pa sèlman fè yon gwo enpak nan Bundesliga, men li deja ap ekri non li nan istwa chanpyona sa a.

Depi premye match li nan Bundesliga, Harry Kane montre li se yon jwè eksepsyonèl. Chak semèn, li ap ajoute gòl sou gòl nan palmarès li, montre yon regilarite ki fè l yon jwè esansyèl pou Bayern Munich. Nan sèlman kèk mwa, li deja enpoze tèt li kòm youn nan pi bon atakan nan istwa resan chanpyona Almay la. Dayè sezon 2023-2024 la, menm ekip li a te fè yon sezon blanch nan sa ki gen pou wè ak twofe. Ansyen jwè Tottenham nan te fini meyè bitè chanpyona a ak 36 gòl.

Pandan sezon 24/25 lan, Harry Kane kontinye ap enpresyone, pa sèlman fanatik Bayern yo, men tout obsèvatè foutbòl yo. Nan tout konpetisyon yo, se 22 match pou 23 gòl ak 9 pas gòl.

Nan Bundesliga sèlman, Kane reyalize 7 triple, ladan yo gen 4 pou sezon sa a. Li tounen yon bèt nwa pou defans yo, ak yon zouti enpòtan pou Bayern nan chimen yo nan chanpyona ak Lig Chanpyon an.

Nan lane 2021, Erling Haaland te make istwa Bundesliga a lè li te vin jwè ki make 50 gòl nan pi piti match jwe (50 match ak Borussia Dortmund). Men, Harry Kane depase siksè sa a avèk yon pèfòmans ki menm pi bon. Li reyalize 50 gòl pa l la nan 43 match sèlman, kraze rekò Haaland lan e mete non li nan liv lò Bundesliga a.

Pandan chanpyona ap pwogrese, Bayern rete premye nan klasman an, gras ak kontribisyon dirèk Kane nan match yo. Fanatik Bayern yo ap espere avèk fòm sa a, klèb la ap retounen sou wout tit yo nan nivo domestik ak entènasyonal. Si Bayern fini sezon sa a kòm chanpyon Almay, anglè a pral finalman ranpòte premye twofe karyè li, yon eksplwa li pa te ka reyalize pandan tan li nan Tottenham Hotspur, ni ak mayo seleksyon an.

Pi gwo siksè Harry Kane nan Bayern pa sèlman baze sou gòl li yo. Se yon jwè ki enspire konfyans nan tout ekip la. Kapasite li pou kreye opòtinite pou lòt jwè, avèk 9 pas gòl deja, montre li pa sèlman yon moun k ap fini aksyon yo, men tou yon jwè ki sèvi ekip li. Sezon pase nan chanpyona a sèlman li te bay 8.

Pou fanatik foutbòl yo, li klè Harry Kane pa sèlman ap adapte li ak nouvo anviwònman li, men li ap domine li. Si li kontinye sou wout sa a, li gen tout chans pou antre nan panteyon lejand Bundesliga yo epi kite yon eritaj ki pral toujou make istwa foutbòl la.

Se sèlman yon kòmansman pou Kane nan Bayern, men tout endikasyon yo montre gwo moman yo ap tann li, klèb la ak fanatik li yo.

KÒMANTÈ

Dènye atik yo