Ekspatriye

Lyon frape fò nan UEFA Champions League bò kote medam yo ak yon viktwa (0-3) lakay ekip AS Roma a. Melchie Dumornay make de (2) gòl nan match la epi pèmèt OL pran premye plas gwoup A a san yo poko janm pran okenn gòl.

Olympique Lyonnais te antre nan 3zyèm jounen faz gwoup la ak yon bon momenntòm. Ekip ki sòti Lafrans lan t ap domine anpil. Gras ak Melchie Dumornay yo te make premye gòl la nan 36yèm minit la, ayisyèn nan te pwofite yon move degajman nan defans Roma a apre yon konè, kote li frape yon bèl demivole ki te fè filè a tranble. Apre sa, nan 42yèm minit la, Lindsey Horan te rekipere yon boul nan mitan teren an pas pou Melchie ki te byen plase, te resevwa balon an epi avèk presizyon, lobe gadyèn Roma a, Camélia Ceasar, pou make dezyèm gòl li nan match la.

Nan dezyèm mitan an, Lyon te kontinye montre dominasyon yo, kote Vanessa Gilles te ajoute yon twazyèm gòl nan eskò a pou asire yon bèl viktwa 3-0. Melchie Dumornay kite teren an nan 82yèm minit la, ranplase pa Eugénie Le Sommer, apre li te deja mete sele li sou match la ak yon gwo pèfòmans.

Lyon fini premye faz jounen yo ak 3 viktwa sou 3 match, san yo poko pran okenn gòl nan konpetisyon an. Avèk 2 gòl ak 1 pas gòl nan Lig Chanpyon an pou sezon sa a, Melchie Dumornay ap klere epi pote yon gwo kontribisyon pou Fenòt yo, ki gen tout chans pou fini premye nan gwoup la.

KÒMANTÈ

Dènye atik yo