la Liga

Dènye fwa ekip Barcelone nan te konnen yon defèt se te nan dat 28 septanm, nan 8èm jounen chanpyona a, depi lè a tout sa Hansi Flick kwaze se chimen l se mitonnen li mitonnen yo, menm Real Madrid pa t epanye, alevwa pou Bayern. Pou fanatik yo se te kè kontan. Dimanch 10 novanm nan farin lan pa vin nan menm sak.

Real Sociedad te resevwa ekip katalan de pye fèm, ki pa t gen sèvis Yamine Lamal. Imanol Alguacil san dout ki te prepare match li, pa t twò enkyete de òje pyèj ki tann nan defans FC Barcelone nan. A chak fwa yon ekip kwaze ak Barcelone li gen yon kantite òje ki egzajere. Si Real Madrid te òje 10 fwa, 6 fwa pou Espagnol Barcelone, 9 fwa pou Crvena Zvezda, ebyen Sociedad te òje sèlman 3 fwa e Barcelone te òje 4 fwa nan match la.

Apre var te retire yon gòl pou Barcelone nan 14èm minit, Sheraldo Becker te mete kichòy nan filè Barcelone nan 33èm minit 1-0, yon gòl ki te tou kole. Barcelone pa t menm fè yon chout kadre nan match la.

Apre defèt sa, Hansi Flick pa kache fistrasyon l. « Nou eseye tout, nou bay tout nou menm, men finalman se pa t jou nou, nou oblije asepte.» Li ajoute pou l di : « Yo te jwe ak detèminasyon, se klè pa gen eskiz sou sa, nou pa t kreye anpil okazyon, nou te byen kòmanse ak match la. Mwen te kontan, men nou vin soufri e gòl la te rive, nou te pran anpil desizyon ki pa t bon tou.»

Malge defèt sa, Barcelone toujou nan tèt klasman a 33 pwen, Real Madrid dezyèm a 27 pwen, li gen match an mwens

KÒMANTÈ

Dènye atik yo