Lòt

Malgre tout difikilte foutbòl ayisyen an ap travèse, Violette AC kontinye domine rejyon Karayib la daprè dènye klasman CONCACAF la ki te pibliye jou ki te 31 mas 2025. Klèb ayisyen an rete pi byen klase pami tout ekip Karayib yo epi li kenbe yon plas onorab nan lis jeneral la kote tout klèb zòn CONCACAF yo melanje.

Klasman CONCACAF la fèt sou de (2) nivo. Premyèman, li bay yon lis jeneral ki mete ansanm tout ekip ki sòti nan Amerik di Nò, Amerik Santral ak Karayib. Nan lis sa a, klèb ki sòti nan lig ki pi konpetitif yo, tankou Meksik ak Etazini, souvan okipe pi wo plas yo. Dezyèmman, CONCACAF bay yon klasman espesyal ki konsène sèlman klèb Karayib yo, sa ki pèmèt nou wè kiyès k ap domine foutbòl rejyon an san ekip Amerik di Nò ak Amerik Santral yo pa melanje ladan l.

Daprè rezilta yo, Violette AC rete pi bon klèb Karayib la epi li klase 70èm sou tout klasman CONCACAF la. Cibao FC, ki sòti nan Repiblik Dominikèn, klase dezyèm pou Karayib la ak yon 81èm plas jeneral. Mount Pleasant, yon ekip Jamayik, rive nan twazyèm pozisyon pou Karayib la epi li okipe 90èm plas sou lis jeneral la. Malgre sitiyasyon difisil foutbòl ayisyen an, plizyè lòt ekip soiti nan peyi a parèt nan klasman an. ASC ki baze nan vil Okap okipe 8èm plas pou Karayib la ak 116èm sou klasman jeneral la. Real Hope FA, ki sòti nan menm vil la, klase 9èm pou Karayib la epi li kenbe 117èm pozisyon jeneral. Baltimore SC, ekip ki soti nan Senmak, rive nan 10èm plas Karayib la ak 118èm sou lis jeneral la. Cavaly AS, ki baze nan lakou Leyogàn, klase 12èm nan Karayib la epi li okipe 121èm plas sou tout lis Concacaf la. Finalman, Tempête FC, yon lòt ekip ki sòti nan Senmak, rive nan 13èm plas pou Karayib la ak 123èm sou klasman jeneral la.

Sa pa etone pèsòn ki wè Violette AC kenbe tèt li sou lis sa. Se yon klèb ki make listwa foutbòl rejyonal la. An 1984, li te vini dezyèm ekip ayisyen ki te ranpòte Ligue Des Champions CONCACAF la. Plis pase twa deseni aprè, an 2022, li te reyalize yon lòt gwo eksplwa, lè li te ranpòte Caribbean Club Championship la. Siksè sa yo mete Violette AC pami klèb ki toujou make prezans yo nan konpetisyon entènasyonal yo malgre mank resous ak enstabilite foutbòl ayisyen an ap viv.

Malgre absans regilye chanpyona nasyonal la ak tout defi ki travèse foutbòl lokal la, Violette AC kontinye fè respekte koulè Ayiti nan zòn Karayib la. Plizyè lòt ekip nan peyi a, tankou ASC, Real Hope, Baltimore, Cavaly ak Tempête, kontinye montre yo kapab kenbe plas yo nan klasman CONCACAF la malgre kondisyon difisil yo ap fè fas. Klasman sa a se yon prèv foutbòl ayisyen an toujou genyen anpil valè, epi li raple enpòtans pou tout aktè yo mete men ansanm pou relanse konpetisyon lokal yo pou pi bon rezilta toujou.

KÒMANTÈ

Dènye atik yo