Serie A

Nan yon eskandal gonfle pri jwè pou avantaj finansye, depi plizyè lane otorite nan peyi Itali yo t ap menenen envestigasyon sou Juventus ak 10 lòt klèb ankò. Nan mwa Me ane pase, yon tribinal te fèmen dosye a akoz yo pa te ka jwenn prèv ki montre malfezans oswa move pratik sou dosye a. Yo te blanchi tout 11 klèb yo ( Juventus, Empoli, Genoa, Parma, Napoli, Pro Vercelli, Chievo, Pisa ak Sampdoria) ansanm ak 61 dirijan.

Men nan fen ane 2022 a, yo te re ouvè dosye a sou Juventus sèlman paske lapolis te jwenn prèv tankou fo dokiman ak anrejistreman apèl ki avili dirijan ekip la. Pou sa, yon tribinal te retire 15 pwen sou yo nan klasman Serie A a, epi fòse tout gran toryan nan tèt ekip la kite.

Men, Juventus te konteste desizyon sa paske yo te twouve li enjis pou yo te pèdi pwen yo te genyen sou tèren alòske eskandal la se te yon eskandal administratif. Nan kòmansman mwa Avril 2023 a, yon lòt tribinal te bay Juventus 15 pwen yo pwovizwaman e voye dosye a pou yon twazyèm jijman.

Jodi Lendi 22 Me 2023 a, vèdik la tonbe. FIGC ki se federasyon foutbòl italyen an retire 10 pwen sou Juventus. Sanksyon sa fè yo pèdi 5 plas nan klasman Serie A a, sòti 2èm a 69 pwen pou tonbe 7èm ak 59 pwen.

Ekip Juventus la mete yon nòt deyò pou laprès pou fè konnen "desizyon sa gen yon gou amè pou yo ak milyon fanatik yo sou yon dosye règ yo pa klè." Yo fè konnen tou yo ap "anlize vèdik la pou wè ki opsyon yo genyen" nan jou ki ap vini yo la.

Juventus kounya genyen 5 pwen an mwens Milan ki 4èm nan klasman an, pwochen advèsè yo e se sèlman 2 jounen ki rete nan sezon an. Sitiyasyon an konplike pou yo ta rive kalifye pou Ligue des Champions sezon k ap vini an.

KÒMANTÈ

Dènye atik yo