Premier League

Alexandrer Isak kontinye fè mirak nan Premier League la. Jodi a ankò, atakan Syedwa a te make yon lòt gòl enpòtan pou Newcastle United nan viktwa (1-2) yo kont Tottenham. Yon seri pèfòmans k ap mete li nan yon klas apa epi tou piti apwoche l de yon nouvo rekò pèsonèl.

Newcastle fè yon gwo kou nan 20èm jounen Premier League la lè yo bat Tottenham (1-2) sou teren yo. Solanke te mete Tottenham devan depi nan 4èm minit match la, men magpies yo te reponn byen rapid ak yon gòl Gordon te make nan 6èm minit. Alexandrer Isak, sòlda fidèl Newcastle la, te make gòl viktwa a nan 38èm minit.

Pèfòmans Isak yo nan 8 dènye match yo se yon bagay ekstrawòdinè. Li make nan 7 nan yo, avèk yon total 9 gòl epi li bay 2 pas gòl. Sou peryòd sa a, Newcastle ranpòte 6 viktwa youn dèyè lòt tou. Anplis, atakan 25 lane a te make kont ekip tankou Liverpool, Manchester United, Brentford, Leicester, Aston Villa, ak Tottenham. Li menm fè yon triple kont Ipswich Town nan yon viktwa (0-4), 21 Desanm ki sot pase a.

Pou sezon sa a, Syedwa a gentan make 13 gòl nan chanpyona a epi li bay 4 pas gòl. Li sanble pare pou depase rekò pèsonèl li nan sezon pase a, kote li te make 21 gòl epi bay 2 pas gòl. Avèk 18 lòt jounen chanpyona ki rete, posiblite yo san limit pou atakan sa a ki genyen yon apeti san fen pou gòl.

Èske Alexandrer Isak pral kraze rekò pèsonèl li sezon sa a? Nou ka wè aklè li sou bon wout la, ak fòs ekip Newcastle la ak fòm ekselan li, li ka atenn nouvo rekò nan karyè li. Tout je yo fikse sou syedwa a, ki ap mache sou dlo ak magpies yo.

KÒMANTÈ

Denye atik yo