AKÈY FIFA Lòt koze

Lòt koze

Messi boude Joe Biden ak distenksyon li an

4 janvye 2025 Steve Pierre 162

Lionel Messi, youn nan pi gwo foutbolè nan listwa espò sa, k ap jwe kounya nan Inter Miami, te gen pou l resevwa meday prezidansyèl libète a nan men prezidan Joe Biden nan "La Maison Blanche". Yon distenksyon ki rekonèt kontribisyon sosyal li nan mond lan. Men, absans li nan seremoni an pa pase inapèsi e li soulve anpil kesyon sou sa ki te ka lakòz li.

"La Maison Blanche", nan yon deklarasyon ofisyèl, te mete limyè sou rezon yo te chwazi Lionel Messi pou yon onè ki ra ak ki prestijye. Nan deklarasyon an, yo raple Messi se pa sèlman yon foutbolè, men yon lidè mondyal ki sèvi kòm anbasadè UNICEF epi ki soutni timoun nan mond lan atravè Fondation Leo Messi. Pou administrasyon Biden nan, kontribisyon sosyal Messi ale byen lwen pase jaden foutbòl la, li touche lavi plizyè milyon moun ki benefisye travay san parèy li fè.

Meday prezidansyèl libète a se pi gwo distenksyon sivil yon moun ka pran nan lakou Etazini. Jodi a, yo te genyen pou onore 19 moun, pami yo ajanten an, Messi. Yo bay li pou moun ki genyen enpak pozitif sou sosyete a, nan zafè politik, syans, atizay, espò, oswa aksyon sosyal. Nan ka Messi a, Biden te rekonèt enpòtans li kòm yon modèl, yon moun ki pa sèlman make listwa foutbòl, men tou itilize enfliyans li pou fè mond lan yon kote miyò.

Malgre tout bèl pawòl sa yo, Messi pa t prezan nan seremoni an. Sa ki fè pi gwo bri se paske li pa t voye okenn reprezantan pou li non plis. Pou anpil moun, absans sa a se yon siy pwoblèm lojistik oswa angajman pwofesyonèl. Gen lòt ki panse absans li ka genyen rapò ak dezakò politik oswa senpleman yon desizyon pèsonèl pou mete aksan sou yon lòt priyorite.

Pulga ajanten an menm san l pa t prezan, rete yon modèl pou limanite, yon egzanp ki montre ke reyisit pa limite ak tit sou yon tèren, men ale tou nan kapasite pou touche lavi lòt. Absans li pa diminye valè onè sa a, men li fè nou sonje, pafwa, pi gwo kontribisyon yo fèt nan silans, lwen pwojektè laprès.