Nan yon kominike ekip Milan AC a sòti, yo anonse atakan espanyòl la Alvaro Morata angaje l ak ekip Milan AC a pou Kat (4) lane, transfè a evalye a 13 milyon ewo ki se kloz sa ekip Atletico Madrid la te mande pou nenpòt ekip ki te vle genyen sèvis jwè a.

Li te kritike dènye jou sa yo pa pèp espanyòl la, Alvaro Morata pa t kite ale òf ekip Milan AC a te fè l lè n konnen ekip Milan an te bezwen ranfòse l sou plan ofansif sitou ak depa Olivier Giroud. Zlatan Ibrahimovic ak Paulo Fonseca reyalize kou sa e nouvèl la anonse konsa « AC Milan fyè pou li anonse siyati Alvaro Borja Morata Martin ki sòti nan Atlético Madrid. Kapitèn seleksyon Espay la sot apèn chanpyon Koup Ewòp, Morata siyen avèk Rossoneri yo, kontra sa ap fini 30 jen 2028, avèk yon opsyon pwolongasyon pou yon lane anplis», se sa nou li sou sit ofisyèl klèb italyen an.

Pandan karyè l, Morata te deja pase nan peyi Itali se te anndan ekip Juventus la, se te nan lane 2014 a 2016 li te retounen nan ekip la an 2020 pou 2022. Li te kòmanse karyè l ak ekip Real Madrid la, li te pase nan Chelsea, li jwe 506 match nan karyè l, li fè 172 gòl, li genyen de (2) lig dè chanpyon, de (2) chanpyona Itali, yon Koup Ewòp.

KÒMANTÈ

Dènye atik yo