Ansyen jwè Manchester City a, Benjamin Mendy, ki te nan yon gwo batay legal depi plis pase de (2) lane akoz plizyè akizasyon vyòl, siyen ak yon nouvo ekip.

Semèn pase a tribinal nan peyi Angletè te lave blan kou koton Mendy nan dosye vyòl yo te akize l yo. Vèdik la te montre lateral goch fransè a pa t koupab nan okenn nan sèt (7) ka yo te akize l yo. Desizyon sa te louvri pòt pou jwè a ki gen 29 lane kounya kontinye karyè foutbòl li san pwoblèm.

Manchester City te koupe kontra jwè a pandan litij la, sa ki fè Benjamin Mendy te lib pou l siyen ak nenpòt ekip. Ebyen san pèdi tan, se FC Lorient, ekip premye divizyon nan peyi Lafrans ki jwenn yon akò pou 2 sezon ak jwè a. Mendy gentan pase vizit medikal yo epi li pral pote nimewo 5 nan ekip Lorient an.

Mendy te Chanpyon Koup Dimond 2018 ak Lafrans, li te deja ranpòte Premier League la kat (4) fwa ak Manchester City. Ligue 1 an se yon chanpyona li byen konnen tou paske l te ranpòte chanpyona sila ak ekip AS Monaco a nan lane 2017 e anvan sa li te jwe pandan 4 sezon nan Olympique de Marseille.

Se yon bon kou pou FC Lorient, menmjan an tou pou Mendy relanse karyè l.

KÒMANTÈ

Dènye atik yo