Aprè anviwon 16 lane ap jwe nan foutbòl ewopeyen an, entènasyonal brezilyen an, Marcelo, retounen lakay li kote l pral gen pou pote yon lòt fwa koulè ekip Fluminense a, klèb ki te fòme l lan.

Brezilyen 34 lane an ki ta pral koupe kontra l ak ekip Olympiakos la semèn ki sot pase a aprè sèlman 5 mwa, pral retounen nan chanpyona brezilyen an avèk kontra sa li siyen ak klèb Rio de Janeiro a k ap fini nan lane 2024.

Defansè brezilyen an, aprè yon pasaj tou kout nan chanpyona grèk la, rantre lakay li kote l pral fin jwe sezon sa epi lòt k ap vini an sou koulè klèb fòmatè li an, Fluminense, k ap evolye nan premye divizyon chanpyona brezilyen an.

Sou rezo sosyal yo, klèb Rio de Janeiro an anonse jodi vandredi an retou ansyen defansè epi kapitèn Real Madrid lan, Marcelo, ki siyen ak yo pou jis 2024 avèk yon ane opsyonèl.

Nan kominike sa klèb brezilyen an pibliye jodi vandredi a, yo site premye enpresyon ansyen lateral goch Real Madrid lan ki fè konnen sa gen lontan li t ap reve tounen lakay li Brezil, nan ekip ki te fòme l lan.

Marcelo ki te rejwenn Real Madrid nan lane 2007 pandan l te gen 18 lane, fè yon gwo pakou ak “merengues” yo kote l te reyisi enpoze l sou bò goch ekip la pandan plizyè ane youn aprè lòt. Ak madrilèn yo, defansè brezilyen an ranpòte 5 Lig dè Chanpyon.

KÒMANTÈ

Dènye atik yo