Ekspatriye

Aprè li te reprezante Ayiti nan Gold Cup 2023, Fafà Picault ap fè fas ak yon lòt gwo desizyon ete 2025 la. Èske li pral retounen ede Ayiti nan Gold Cup la, oswa èske li pral chèche viv yon eksperyans inik nan Mondyal Klèb yo ak Inter Miami CF?

Nan mwa jen 2025 k ap vini la, de (2) gwo konpetisyon foutbòl ap fèt an menm tan: Gold Cup (14 jen – 6 jiyè) ak Mondyal pou Klèb yo (15 jen – 13 jiyè). Fafà Picault, ki fenk siyen ak Inter Miami CF, gen chans patisipe nan toulède. Men nan reyalite a li dwe fè yon sèl chwa.

Gold Cup la, yon konpetisyon li deja te jwe nan 2023 ak seleksyon Ayiti a, ofri yon opòtinite pou li kontinye ede peyi l fè pwogrè sou sèn rejyonal la. Ayiti ap konte sou eksperyans li pou rive pi lwen, paske an 2023 yo te elimine nan premye tou. Men, yon lòt bò, Koup Dimond pou Klèb yo se yon opòtinite ki pa fasil menm, sitou paske li ap premye fwa pou Fafà patisipe nan yon konpetisyon konsa. Jwe bò kote Messi ak lòt gwo jwè pandan y ap defann koulè Inter Miami ta ka make karyè li nan yon fason espesyal.

Desizyon an pa fasil. Chwazi Gold Cup la vle di mete peyi li devan e rete fidèl ak istwa l ak seleksyon nasyonal la. Men chwazi Mondyal Club la ta ka louvri pòt pou plis rekonesans nan mond foutbòl entènasyonal la, pandan l ap fè eksperyans nan yon nivo diferan. Dezyèm chwa a se yon bagay fanatik Ayiti p ap padone l.

Poko gen okenn siy klè sou direksyon Fafà pral pran. Men, nenpòt desizyon li fè a pral gen enpak, pa sèlman sou karyè li, men tou sou Ayiti ak Inter Miami. Èske li pral chwazi rete fidèl ak peyi l oswa swiv rèv klèb li? Foutbòl mondyal la ap ret tann avèk enpasyans repons lan.

KÒMANTÈ

Dènye atik yo