Ekspatriye

Seksyon fanm Olympique Lyonnais a kontinye prepare pou lavni pandan y ap konsolide prezan yo. Jodi a klèb la genyen yon nouvo siyati, se yon defansè santral ki gen 21 lane, ki rele Elma Novah Junttila-Nelhage. OL montre angajman li pou kenbe yon ekip ki melanje jèn ak eksperyans.

Elma Novah Junttila-Nelhage, ki fèt nan peyi Lasyèd jou ki te 21 me 2003, li siyen yon kontra k ap dire de (2) sezon edmi, jiska 30 jen 2027, avèk Olympique Lyonnais Feminin. Nouvo defansè santral la vini ak yon eksperyans enpòtan aprè li te jwe nan BK Häcken, kote li te jwe 91 match pwofesyonèl tout konpetisyon li jwe, make 3 gòl, ak jwe 51 match nan Damallsvenskan, premye divizyon foutbòl feminen nan peyi Lasyèd.

Malgre fòs defansif ekip lyonèz la ki pran sèlman 3 gòl nan 11 match nan chanpyona D1 Arkema a, ak 1 gòl nan 6 match Women’s Champions League, klèb la pran desizyon pou ranfòse defans li ak yon jwè ki genyen gwo potansyèl. Elma te deja fè eksperyans nan Women’s Champions League, kote li te ede BK Häcken rive nan kadefinal pandan sezon 2023/2024 la.

Elma ap vin konplete yon ekip ki deja genyen yon melanj solid de jèn ak veteran. Pami jèn yo, OL konte sou jwè tankou Melchie Dumornay (21 lane), Vicki Becho (21 lane), Inès Benyahia (21 lane), ak Kysha Sylla (20 lane) pou n site sa yo sèlman. Ekip la ka benefisye tou de eksperyans veteran tankou Wendie Renard (34 lane), Amel Majri (31 lane), ak Lindsey Horan (30 lane), ki deja pwouve valè yo nan match enpòtan yo.

Elma Novah Junttila-Nelhage pral fè premye aparisyon li sou koulè nouvo ekip li a, kont Dijon jou k ap 8 janvye 2025 lan, nan Groupama OL Training Center. Ak yon estrateji ki baze sou balans ant jèn ak eksperyans, OL prepare yon ekip ki genyen tout kapasite pou kontinye domine lig domestik la ak Women’s Champions League la.

KÒMANTÈ

Dènye atik yo