AKÈY FIFA Lòt koze

Lòt koze

Nenad Bjelica kite Dinamo Zagreb : Fabio Cannavaro pran kòmand ekip la

2 janvye 2025 Steve Pierre 162

Dinamo Zagreb deside mete fen nan kolaborasyon ak Nenad Bjelica aprè yon kout pasaj nan tèt ekip la. Antrenè a te reyalize kèk siksè, men rezilta nan chanpyona a se te yon desepsyon pou direksyon klèb la. Fabio Cannavaro, ansyen chanpyon Dimond ak Balondò, pran wòl nouvo antrenè a ak lespwa pou remete ekip la sou bon chimen.

Nenad Bjelica te kòmanse travay kòm antrenè Dinamo Zagreb nan dat 28 septanm 2024, aprè li te ranplase Sergej Jakirović, ki te kite klèb la aprè yon defèt katastwofik (9-2) kont Bayern Munich nan Lig Chanpyon an. Bjelica te fè yon bon kòmansman, ak yon viktwa klè (5-1) kont Lokomotiva Zagreb nan premye match li nan chanpyona SuperSport HNL.

Sepandan, malgre kèk bon pèfòmans okòmansman, bilan final Nenad Bjelica pa t ase pou kenbe li nan tèt ekip la. Nan 15 match li jere pandan twa mwa, ekip la te reyalize 5 viktwa, 6 match nil, ak 4 defèt. Rezilta sa yo te kite Dinamo Zagreb twazyèm nan klasman HNL aprè 18 jounen (8 viktwa, 5 nil, 5 defèt) ak 7 pwen dèyè lidè chanpyona a HNK Rijeka. Nan Lig Chanpyon UEFA a, ak 2 viktwa, 2 nil, epi 2 defèt, yo klase 24èm. Rezilta sa yo te konfime nesesite pou klèb la fè yon nouvo kòmansman.

Dinamo Zagreb te vire je li sou non yon lejann nan mond foutbòl la: Fabio Cannavaro. Cannavaro pote ak li yon rekò enpresyonan kòm jwè, tankou ranpòte Koup dimond FIFA 2006 lan ak Itali epi pran Balon Dò menm lane a. Kòm antrenè, li te travay nan Guangzhou Evergrande nan peyi Lachin, Al-Nassr Arabi Sawoudit, Benevento ak Udinese nan peyi Itali. Malgre sa pa toujou ale byen.

Avèk Nenad Bjelica ki kite ekip la, Fabio Cannavaro genyen kounye a yon gwo responsabilite pou rebati Dinamo Zagreb. Misyon li pral vize diminye diferans 7 pwen ki separe yo ak Rijeka nan chanpyona HNL la epi prepare ekip la pou reyalize pi bon rezilta nan konpetisyon Ewopeyen yo. Fanatik Dinamo yo ap tann Fabio Cannavaro ak lespwa non lejann li pote an pral transfòme ekip la nan yon fòs dominan ankò.