Ekspatriye

Aprè 5 defèt youn dèyè lòt, Seattle Reign FC rive genyen kont Houston Dash (2-1) ayè, gras ak yon pèfòmans eksepsyonèl Nérilia Mondésir te bay. Pi bon jwè match la, Nérilia make premye gòl li nan NWSL la, epitou fè l antre nan listwa kòm premye foutbolez ayisyèn ki fè sa.

Nérilia Mondésir te montre tout talan li nan match kont Houston Dash la, nan kad 25èm jounen chanpyona NWSL la, ki vle di National Women's Soccer League — pi gwo lig foutbòl fanm Ozetazini. Seattle Reign FC te nan yon sitiyasyon difisil, ak 5 defèt youn dèyè lòt epi yo pa t ka make menm yon gòl nan dènye 5 match sa yo. Match la te kòmanse byen pou Seattle, lè Amerikèn nan Olivia Athens louvri eskò a nan 22èm minit. Men sèlman 3 minit pita, venezelyèn nan Bárbara Olivieri jwenn egalizasyon an sou penalti pou Houston Dash.

Tout bagay te sanble ap derape pou Seattle Reign ankò, men nan 65èm minit, Nérilia Mondésir leve vwa l nan match la avèk yon gòl ki chanje tout dinamik la. Se te premye gòl li nan NWSL la, e li pèmèt ekip li a ranpòte yon viktwa enpòtan (2-1), nan Lumen Field la, pou kraze move seri defèt sa.

Pou ansyen jwè Montpellier a gòl sa gen yon gou patikilye. Li pa sèlman make premye gòl li pou Seattle, men li vin fè listwa kòm premye ayisyèn ki make nan NWSL la. Aprè match la, li te byen merite tit pi bon jwè rankont lan.

Avèk pèfòmans sa, Nérilia Mondésir kontinye bay fyète peyi l epi montre Ayiti genyen talan foutbòl fanm ki ka briye sou pi gwo sèn mondyal yo.

KÒMANTÈ

Dènye atik yo