PremyeDivizyon

Ouanaminthe FC deside mete fen nan kolaborasyon li ak antrenè Ernst Bazile aprè sèlman de (2) mwa sou ban ekip la. Klèb la anonse desizyon sa a aprè seri move rezilta kotch Bazile te reyalize depi li te pran tèt ekip la jou ki te 2 fevriye 2025 lan.

Nan tounwa 75èm anivèsè radyo 4VEH la, Ouanaminthe FC te genyen anpil difikilte pou te enpoze li. Malgre li pa t pèdi okenn match, ekip la pa t ka jwenn okenn viktwa tou. Men rezilta li te reyalize: (1-1) kont ASC, (0-0) kont FICA ak (0-0) kont Real Hope FA.

Se te yon move siyal pou atak la, ki pa t kapab make plis pase yon sèl gòl nan tout tounwa a. Men, se nan chanpyona nasyonal espesyal la sitiyasyon an te vin pi difisil pou Ouanaminthe FC. Pou premye jounen an, Ouanaminthe FC te pèdi (3-1) kont FICA, yon match kote ekip la te montre anpil feblès nan defans li. Pandan dezyèm jounen an, yo t ap resevwa ASC nan pak Notre Dame nan kote yo te tonbe ankò (0-1) lakay yo.

Ak 0 pwen sou 6 posib, Ouanaminthe FC klase dènye nan Gwoup Nò a. Sipòtè yo ak dirijan yo te montre yo pa kontan ditou, sa ki lakòz direksyon ekip la pran desizyon pou revoke kotch Bazile san pèdi tan.

An total, Ernst Bazile te dirije 5 match sou ban Ouanaminthe FC. Bilan li se: 0 viktwa, 3 match nil ak 2 defèt. Yo make 2 gòl epi yo te pran 5 gòl. Sa montre klèman atak la pa t efikas ditou, pandan defans la te montre gwo feblès li tou. Ouanaminthe FC pa janm rive make plis pase 1 gòl nan yon match pandan peryòd kotch Bazile la, epi yo pran an mwayèn 1 gòl pa match.

Jiskaprezan, Ouanaminthe FC poko anonse ki moun ki pral pran plas Ernst Bazile sou ban ekip la. Genyen plizyè non ki deja ap sikile kòm kandida potansyèl pou ranplase li, men okenn desizyon ofisyèl poko pran. Pandan tan sa, ekip la ap prepare pou pwochen match li ki pral yon gwo defi. Ouanaminthe FC pral vwayaje pou l afwonte Real Hope FA, ekip ki se chanpyon an tit. Match sa a ap yon tès difisil pou Kapitèn yo ki pral eseye relanse tèt yo.

Sipòtè Ouanaminthe FC yo rete enkyè sou avni ekip la, e yo swete nouvo antrenè a ki pral pran dirije yo an ap genyen kapasite pou redrese sitiyasyon an.

KÒMANTÈ

Dènye atik yo