PremyeDivizyon

FICA jiskaprezan ap fè yon bon demaraj nan chanpyona nasyonal espesyal la. Aprè de (2) premye jounen solid, kote yo ranmase 6 pwen sou 6, FICA mete tout zam yo deyò pou prepare gran randevou derby kapwa a kont ASC, ki fikse pou dimanch k ap vini an.

Nan premye jounen chanpyona a, FICA te fè yon bon sòti ak yon bèl viktwa (3-1) kont Ouanaminthe FC. Ekip la te montre tout kalib li nan match sa a, ak yon atak ki te klè, efikas epi byen anime. Nan dezyèm jounen an, FICA pa t bese rit lan. Yo te resevwa chanpyon antit Real Hope FA epi yo te genyen (1-0) nan yon match ki te chaje ak taktik epi detèminasyon. Avèk 2 viktwa pou 2 match, Kolonb yo ap domine Gwoup Nò a ak 6 pwen, epi yo se lidè klasman an pou kounye a.

Jodi a, Jedi 3 Avril 2025, pou kontinye prepare derby kapwa a kont ASC, FICA te mete tèt li a lèprèv nan yon match amikal kont FC Toro Nord. Nan match sa a ki te jwe nan pak Saint-Victor a, yo fè yon bèl viktwa (2-1) ki montre ekip la kontinye ap travay serye. Match sa a te pèmèt antrenè a, Roudy Joseph, teste kèk nouvo konbinezon epi bay rit a plizyè jwè kle.

Tout je pral fikse sou Pak Saint-Victor dimanch k ap vini an kote FICA pral kwaze zam ak ASC, nan sa anpil moun konsidere tankou pi gwo match nan Nò a. Derby sa a toujou pote anpil emosyon, pasyon ak rivalite istorik ant de (2) gwo ekip sa yo.

Avèk bon fòm ekip la ak moral jwè yo ki anlè, FICA pare pou mete dife sou pelouz la, pandan ASC ap chache reponn pou montre yo pa piti. Yon viktwa pou FICA ka fè yo pran distans sou rès ekip ki nan gwoup la. Yon viktwa Vye Kòk Kapwa yo sou Kolonb lan ap pèmèt yo pran tèt klasman gwoup la.

KÒMANTÈ

Dènye atik yo