Lòt

Pierluigi Collina, ansyen gwo abit italyen ki jodi a se prezidan komisyon abit FIFA a vle chanje fason penalite egzekite nan foutbòl la. Li pwopoze pou penalite yo fèt menmjan yo egzekite tiwobi yo, kote si gadyen an repouse balon an oswa si li frape poto, jwèt la sispann p ap gen rebon.

Nan foutbòl jodi a, majorite penalite yo fini ak yon gòl. Estatistik yo montre anviwon 75% penalite yo antre, sa ki vle di tirè yo genyen anpil avantaj sou gadyen yo. Collina vle mete plis ekilib, paske li panse twòp penalite fini ak yon gòl, menm lè gadyen an rive repouse balon an. Souvan, tirè a oswa yon lòt jwè pwofite sou rebon an pou mete balon an nan filè. Si règ sa a pase, sa p ap posib ankò.



Pou bay plis valè ak pwopozisyon li an, Collina mete aksan sou Bundesliga a kote, depi sezon sa a, 19% penalite yo rate. Sa vle di, malgre tout avantaj yo, tirè yo pa toujou reyisi. E si nou ajoute sou sa, posiblite yo genyen pou yo fini aksyon an sou yon rebon, avantaj lan tèlman gwo Collina panse li pa jis pou gadyen yo.



Si règ sa pase, sa ka chanje anpil bagay nan foutbòl la. Jwè ki frape penalite ap oblije pi byen chwazi kote yo mete balon an, paske yo p ap ka konte sou yon dezyèm chans. Gadyen yo, yo menm, ap santi yo genyen plis pouvwa, paske si yo repouse balon an, aksyon an ap fini epi se ap 5 mèt 50.



Collina, ki sot selebre 65 an li, vle kontinye ede foutbòl modèn nan evolye. Se pa sèl penalite li vle amelyore. Li te pale tou sou deba ki genyen sou òje yo, kote teknoloji VAR montre diferans de kèk milimèt sèlman. Li di teknoloji a ap ede jwèt la pi klè, men li pa kont lide pou genyen yon limit minimòm pou òje yo, pou evite deba san fen sou desizyon yo.



Kounye a, se IFAB ki dwe deside si l ap aksepte nouvo règ sa a oswa si penalite ap kontinye jan yo ye kounye a. Si yo adopte li, sa ap fè yon gwo chanjman nan fason foutbòl jwe. E ou menm, èske ou panse règ sa ap fè foutbòl pi jis oswa li ka twò di pou moun k ap gen pou egzekite yon penalite?

KÒMANTÈ

Dènye atik yo