ChampionsLeague

Aprè 34 lane kolaborasyon, UEFA deside fini ak kontra li te genyen ak ajans swis la, Team Marketing, pou vann dwa konpetisyon li yo. Otorite foutbòl ewopeyen an deja antre nan negosiyasyon ak konpayi ameriken Relevent Sports pou peryòd 2027-2033 a.

Pandan plizyè lane, Team Marketing t ap jere vant dwa televizyon ak komèsyal lig ewopeyen yo atravè lemond. Men, si negosiyasyon ak Relevent Sports rive abouti, sa ka ouvè chimen pou UEFA jwe final Ligue des Champions yo ak lòt gwo match ewopeyen sou tè ameriken yo.



Relevent Sports se yon konpayi ki baze li nan vil New York, epi li fè pati anpi Stephen Ross, pwopriyetè ekip NFL Miami Dolphins, ap dirije. Ross pa janm kache rèv li pou mennen gwo match foutbòl ewopeyen yo vin jwe sou teren Ozetazini yo.



Pou Team Marketing, desizyon sa a make "fen yon epòk". Nan yon kominike, ajans lan pa kache desepsyon li, men li mete aksan sou reyalizasyon li yo. Daprè yo, pandan 35 lane kolaborasyon yo ak UEFA, yo te kreye yon modèl komèsyal ki pote plis pase 50 milya ewo pou foutbòl ewopeyen an.



Malgre sa, yo deklare yo p ap abandone, epi yo rete konfyan eksperyans ak konesans yo sou foutbòl ewopeyen an pral kontinye sèvi yo. Fòk nou di tou chanjman sa a ka voye plis pase 170 travayè ajans lan al chita lakay yo.



Si kontra a siyen ak Relevent Sports, sa ka chanje fason foutbòl ewopeyen an distribiye ak gade atravè mond lan, ak yon gwo enfliyans ameriken sou lig UEFA yo.

KÒMANTÈ

Dènye atik yo