Ekspatriye

Ekip Liga Deportiva Universitaria de Quito jwenn plas li nan kadefinal Copa Libertadores 2026 la aprè li elimine Mirassol nan yon seri ki te mande anpil batay. Match retou uityèmdefinal la jwe jedi 20 dawout la nan Estadio Rodrigo Paz Delgado, de ekip yo te fè 0-0 aprè 90 minit, anvan Liga de Quito ranpòte seyans penalite a 5-4.

Nan mitan defans LDU a, ekspatriye ayisyen Ricardo Adé te gen yon plas enpòtan. Defansè entènasyonal ayisyen an te kòmanse match la kòm youn nan poto mitan liy defans lan, pandan li te pote eksperyans li pou ede ekip la kenbe san pran gòl pandan tout tan reglemantè a. Anvan match la, li te deja konsidere kòm youn nan eleman defansif ki pi regilye nan ekip la.

Adé te patisipe tou nan match ale a, ki te fini 1-1 nan peyi Brezil, sa ki vle di li te pran pati nan toude rankont seri a. Nan premye match la, li te menm pote braslè kapitèn Liga de Quito a.

Match retou a te rete trè sere. Malgre kèk opòtinite sou chak bò, okenn ekip pa t rive jwenn wout gòl la, sa ki te fòse seri a antre dirèkteman nan penalite. Liga de Quito te montre plis kalm nan moman desizif la, li make tout senk penalite li yo, pandan Victor Luís rate penalite ki te vin elimine Mirassol.

Avèk kalifikasyon sa, Ricardo Adé ak Liga de Quito kontinye avanti yo nan pi gwo konpetisyon klèb Amerik Disid la. Ekip ekwatoryen an pral rankontre Palmeiras nan kadefinal la. Palmeiras te valide pwòp plas li aprè li te elimine Cerro Porteño sou yon viktwa 1-0 nan match retou a, pou yon viktwa total 2-1 nan seri a.

Pou Adé, ki se youn nan entènasyonal ayisyen ki pi eksperimante yo, prezans li nan etap sa reprezante yon lòt bèl chapit nan karyè li sou kontinan Amerik Disid la. Li kontinye jwe yon wòl enpòtan nan defans Liga de Quito, yon ekip ki te deja rive nan demifinal Libertadores 2025 la e ki ap chèche fè yon lòt gwo kous nan edisyon 2026 la.