Ekspatriye

Akoz move rezilta yo pandan kòmansman sezon an, dirijan En Avant Guingamp yo pa pran tan pou chanje estaf teknik lan. Jérôme Molinier nonmen kòm nouvo antrenè ekip fanyon an k ap evolye nan Seconde Ligue lan.

En Avant Guingamp ki dènye nan D2 an, revoke Pierre-Henry Coulon ki te pran tèt ekip lan ete ki sot pase an. Antrenè fransè 30 lane an pa t rive fè menm yon viktwa avèk medam Fanyon yo ki fè sèlman yon grenn pwen aprè 7 jounen chanpyona.

Eliminasyon wikenn pase an nan Coupe de France kont Stade Rennais te gout dlo ki ranvèse vaz la. Chelsea Domond ak Betina Petit-Frère ki avèk seleksyon nasyonal ayisyèn lan nan peyi Beliz pral gen pou travay sou lòd Jérôme Molinier lè yo retounen nan peyi Lafrans.

Ansyen antrenè U-19 US Concarneau an, ki gen 52 lane, ap gen pou pran fonksyon lendi k ap vini la avèk pou misyon redrese sitiyasyon En Avant Guingamp ki sou menas pou ta desann nan twazyèm divizyon.