CopaLibertadores

An 2021, Andreas Pereira te fè yon erè ki te koute Flamengo final Copa Libertadores la kont Palmeiras. Katran aprè, sò a fè l tounen nan menm konpetisyon an, men ak mayo Palmeiras, pou yon lòt final kont Flamengo. Anpil moun te espere l t ap jwenn revanj li. Sa pa rive.

Final 2021 an toujou make memwa fanatik yo. Pereira te pèdi yon balon enpòtan pandan pwolongasyon an, epi Palmeiras te pwofite pou make gòl ki te fè yo ranpòte tit la. Aksyon sa a te swiv jwè a pandan plizyè lane, anpil moun te konsidere l kòm yon move chans nan gwo randevou yo.

Depi jou sa a, non Pereira a te tounen tèm konvèsasyon nan opinyon piblik la. Men foutbòl se yon sèk ki toujou vire. Lè Palmeiras siyen l nan lane ki vin aprè yo, anpil moun te wè sa kòm yon nouvo etap, yon fason pou jwè a rebati konfyans li. Lè ekip vèt la pran tikè li pou final Libertadores 2025 lan, opozan final la se Flamengo, desten an te sanble menm ap ekri yon sèn fim.

Kalkil la te senp : menm konpetisyon, menm gwoup, menm final, yon lòt mayo, yon lòt misyon. Kontèks la t ap ofri Andreas Pereira yon opòtinite ra : reprann kontwòl istwa li, siye mak 2021 an, fè tout moun pe . Tansyon an te lou, tout moun atravè kontinan an t ap swiv dosye a ak presizyon. Chak foto antrènman, chak deklarasyon, chak mouvman te reprezante yon siy.

Andreas Pereira te titilè nan final la, li te eseye jwe ak disiplin epi ede ekip li kenbe kontwòl mitan teren an. Men Flamengo te pi efikas. Yon tèt Danilo te bay ekip wouj la avantaj, epi gòl sa a te sifi pou fè diferans lan. Palmeiras pa t rive reponn, match la fini ak yon lòt defèt pou Pereira nan yon final Libertadores.

Aprè 2021 ak 2025, rezilta yo klè : jwè a te patisipe nan de (2) final Libertadores, e li pèdi tou de. Yon fwa ak Flamengo, yon lòt fwa ak Palmeiras, e chak fwa kont ansyen oswa nouvo ekip li.

Pou Andreas Pereira, Copa Libertadores rete yon konpetisyon ki difisil. De (2) final, de (2) defèt. Men foutbòl toujou bay lòt chans. Se sèlman tan k ap montre si li va jwenn yon jou pou chanje listwa sa.