PremyeDivizyon

Jodi dimanch 30 novanm 2025 lan, se pral yon gwo fèt foutbòl nan vil Okay kote Juventus pral gen pou jwe kont America. Yon match foutbòl ki konte pou 4èm jounen chanpyona nasyonal premye divizyon an.

De ekip yo ki twouve yo nan gwoup Sid Lig ayisyèn foutbòl lan, pral gen pou twoke kòn yo jodi dimanch lan nan Lang des Gabions an. Se pral okazyon pou Solo yo reprann yo aprè defèt yo jounen avan an 0-2 kont Cavaly Léogâne.

Pou match sa, antrenè Juventus lan, Hilas Jean Manel konvoke yon gwoup 21 jwè ki pral gen pou defann koulè Solo yo. Yon match enpòtan pou tou 2 ekip yo, ki pa t rive genyen nan dènye jounen an.

Bò kote America k ap resevwa match sa, yo sòti nan yon match nil wikenn pase an kont Don Bosco Pétion-Ville (1-1). Kolòs yo k ap resevwa jodi dimanch lan nan Lang des Gabions an pral chache premye viktwa yo nan konpetisyon an.

Aprè 3 jounen ki jwe deja yo, Juventus genyen 3 pwen, pandan America bon dènye nan gwoup Sid lan avèk 2 grenn pwen. Yon match foutbòl ki anonse anpil pasyon bò kote fanatik foutbòl nan vil Okay.