SeleksyonNasyonal

Seleksyon nasyonal ayisyèn lan ap prepare l pou jwe kont Beliz nan okazyon premye faz eliminatwa CONCACAF pou Mondyal 2027 lan. Pou match sa, Grenadye yo p ap ka konte sou Roxanne Vilain, Lourdjina Étienne ak Chloé Joseph ki pa rejwenn ekip lan.

Antrenè ekip nasyonal lan, Malou Quignette, genyen anba lòd li 20 jwez sou efektif 23 li te konvoke pou rasanbleman sa. Daprè Federasyon ayisyèn foutbòl (FHF), jwez yo pa rive Beliz pou rezon diferan.

Defansè West Virginia University an, Roxanne Vilain, rate yon lòt okazyon pou ta kapab rejwe avèk Grenadye yo. Depi fevriye 2024 fas Pòtoriko, jwez 23 lane an pa janm gen chans rejwe sou koulè ekip nasyonal lan, malgre li patisipe nan plizyè rasanbleman.

Chloé Joseph li menm ki te konvoke pou rasanbleman Mawòk lan rate konvokasyon sa akoz yon blesi nan dènye lè. Malou Quignette pral gen pou monte yon defans san 2 nan jwez li te konvoke yo.

Lòt absans lan se Lourdjina Étienne ki pa la akoz pwoblèm administratif. Jèn atakan FC Fleury an oblije pran pasyans toujou anvan pou l ta kapab jwe pou premye fwa avèk gwo seleksyon an. N ap note, jwez 18 lane an te briye nan eliminatwa CONCACAF U-17 2024 lan.

Seleksyon nasyonal ayisyèn lan ap jwe demen dimanch lan a 8è nan aswè nan lè peyi Dayiti kont Beliz nan Bèlmopan.