Ekspatriye

Olympique Lyonnais valide tikè li pou demifinal Ligue des Champions fi yo aprè yon gwo viktwa kont Bayern Munich (4-1) nan Groupama Stadium nan. Aprè li te make nan match ale a kote OL te genyen (2-0) an Almay, Melchie Dumornay fè plis bwi ankò ak yon gòl epi yon pas nan retou a.

Bayern te bezwen yon repons aprè li te pèdi (2-0) lakay li. Yo te louvri eskò a nan 33èm minit gras ak Klara Bühl, sa ki te mete sispens nan match la (0-1), mitan an te fini konsa.

Men, Lyon pa t pran tan pou reponn. Nan 46èm minit, Kadidiatou Diani voye yon sant ekzakt epi Melchie Dumornay monte pi wo pase Hansen (1m65) ak Gwinn (1m71) pou l mete yon tèt sensasyonèl. Malgre li mezire 1m68, li montre tout fòs li nan anlè a pou mete Lyon tounen sou bon wout la (1-1).

Aprè egalizasyon an, Lyon kontinye mete presyon sou Bayern. Nan 54èm minit, Diani pran yon boul sou yon move pas epi voye yon frap ki fè match la (2-1). Sa pa t fini. Nan 60èm minit, Diani ankò li bay yon pas desiziv pou Tabitha Chawinga ki bay Lyon plis avantaj (3-1).

Pou mete kouwòn sou match la, Melchie Dumornay fini ak yon pas gòl pou Ada Hegerberg nan tan adisyonèl la (90+3’). Atakant nòvejyen an glise balon an ant janm gadyèn lan pou mete yon dènye kout pwen sou match la (4-1).

Aprè (2-0) nan match ale epi (4-1) nan retou a, Lyon kalifye san diskisyon pou demi-final Ligue des Champions fi yo. Fenottes yo kapab jwe kont Arsenal oswa Real Madrid pou eseye rive nan final la.

Avèk yon Melchie Dumornay ki ap klere pi plis chak jou, Lyon ka reve pou chèche yon lòt kouwòn Ewopeyen.

KÒMANTÈ

Dènye atik yo