Ekspatriye

Aprè yon demonstrasyon ak fòs kont Bayern Munich nan kadefinal yo (2-0 ale, 4-1 retou), Olympique Lyonnais ak Melchie Dumornay rive nan demifinal Ligue des Champions fi yo. Ekip fransèz la pral kwaze ak Arsenal, yon gwo ekip anglè ki genyen gwo anbisyon sou sèn Ewopeyen an.

Nan lòt kadefinal la, Arsenal ak Real Madrid te fè yon konfwontasyon ki chaje ak sispens. Nan match ale a, Real Madrid te pran avantaj sou pwòp teren li, Ciudad Real Madrid la, ak yon viktwa (2-0) gras ak Castillo epi Linda Caicedo. Nan match retou a, Arsenal pa t bay vag. Yo reponn ak yon gwo viktwa (3-0) nan Emirates Stadium nan, kote Alessia Russo te make 2 gòl epi Mariona Caldentey te ajoute yon lòt. Avèk rezilta sa yo, Arsenal rantre nan dènye kare a epi pral jwe kont Lyon nan yon afich ki deja sanble ak yon final avan lè.

Lyon ak Arsenal deja konn rankontre sou sèn Ewopeyen an. OL, ki se ekip ki pran plis tit nan Ligue des Champions an, 8 kouwòn, ap chèche ranfòse dominasyon li. Men, Arsenal, ki pa t rive nan final depi li te chanpyon an 2007 la, vle bay tout fòs li pou l sa pran yon lòt.

Lyon ap konte sou yon Melchie Dumornay ki nan yo gwo fòm, aprè li te make epi bay yon pas gòl nan viktwa kont Bayern jodi a. Ansanm ak Kadidiatou Diani, Ada Hegerberg, Lindsey, epi tout lòt Fenottes yo, ekip sa rete youn nan pi danjere nan konpetisyon an.

Kalendriye demifnal yo :
● Match ale : 19 oswa 20 avril, nan Emirates Stadium nan vil Lond
● Match retou : 26 oswa 27 avril, nan Groupama Stadium nan vil Lyon.

Ekip ki pral genyen seri sa a pral chèche tit la nan gran final la, ki fikse pou 25 me nan Bilbao. Lyon kontinye ap kouri dèyè yon 9èm Ligue des Champions, men Arsenal pare pou frape fò. Melchie Dumornay ak Fenottes yo pral genyen pou goumen di pou yo rive nan final la.

KÒMANTÈ

Dènye atik yo