Ekspatriye

Nan match ale final CFU Championship la ki te jwe jodi a nan Estadio Olímpico Félix Sánchez, ekip jamayiken an, Mount Pleasant FC, pran yon viktwa presye (0-1) sou O&M FC gras ak yon gòl byen bonè Kimoni Bailey te fè nan 8èm minit lan.

Jwè Ayisyen yo byen reprezante nan rankont lan nan kan Mount Pleasant la. Clifford Thomas te nan onz inisyal la, li jwe tout 90 minit yo ak li te pran yon katon jòn.

Johnson Jeudy te kòmanse sou ban an, men li antre nan 60èm minit nan plas Lamar Walker epi li pote vivasite nan mitan teren an pandan 30 dènye minit yo. Waby Exilus, li menm, te pase tout match la sou ban an.

Pou O&M FC, Frantzety Hérard, sèl Ayisyen nan ekip dominiken an, te jwe tout 90 minit yo, li te batay anpil malgre defèt la.

De ekip yo pral rankontre ankò nan match retou a, ki fikse pou 2 desanm, a 7è nan aswè, nan Kingston, Jamayik. Mount Pleasant gen avantaj gòl ale a, men final la toujou ouvè paske O&M kapab reponn lakay advèsè a. Yon randevou ki anonse ki pral cho pou detèmine chanpyon CFU 2024 la.